CULTURE – Scrivi di cine

Al scjât ai 13 di Setembar il tiermin par partecipâ a la VIII dal Concors par Tescj Cinematografics in Lenghe Furlane inmaneât dal Centri di Espressions Cinematografichis (www.cecudine.org) di Udin.
Il concors al à chê di prudelâ la scriture di storiis par films e senegjaturis, di articui di critiche e di saçs cinematografics par furlan, deventant cussì une palestre par autôrs e critics di cine.
Al sarà dividût in cuatri sezions: sezion a) dedicade aes senegjaturis; sezion b) dedicate aes storiis par film; sezion c) dedicade ai articui di critiche e sezion d) dedicade ai saçs sul cine.
La jurie che e varà di esaminâ i tescj che a parteciparan, li che no crodi valevul nissun dai lavôrs presentâts, e pues decidi di no dâ cualchidun o nissun dai premis previodûts.
Lis voris premiadis a vignaran publicadis su la riviste anuâl di cine Segnâi di lûs. Dut câs, a podaran vignî publicadis su la stesse riviste ancje chês segnaladis e chês judicadis plui interessantis, tal stes an o in agns seguitîfs.
A son ametûts in concors dome i lavôrs in lenghe furlane, scrits di un o plui autôrs. Lis senegjaturis a àn di jessi scritis in furlan comun e inte grafie uficiâl pes parts tecnichis e descritivis (a son ametudis lis varietâts pes parts dialogadis simpri tal rispiet de grafie uficiâl).
Lis storiis par film, i articui critics e i saçs a varan di jessi scrits in furlan comun e inte grafie uficiâl.
Ogni concorent o grup di concorents al pues partecipâ dome cuntun lavôr par ogni sezion.
Par vê plui informazions, si pues contatâ il Cec in vie Vilalte a Udin, telefonant al numar 0432 299545.
REDAZION