CULTURE – L’«acès» dal furlan in Cjargne

Si visaiso cuant che, su lis rêts de Rai, tai agns Otante, a lavin in onde i «Programmi dell’accesso»? A jerin alc di no podêlu proponi…e ce stufadice! Ve, cuant che su Telefriuli si spie «CarniaNews», setemanâl informatîf paiât de Comunitât di mont de Cjargne, la sensazion e je propit la stesse.
Comencìn dal formât. Al è un program gjornalistic. Isabella Gregoratto –  otim il so furlan –  e interviste l’assessôr, il president, il politic di turni. Buinis lis domandis. Semplicis, ma simpri coretis cul teme, lis ripresis. Di miorâ il montaç, il salt de sigle di inizi, che si bloche bot e sclop cence une ombre di continuitât, nancje musicâl, cu la interviste. Stop. Il program al è finît cussì: une interviste di sîs minûts, avonde stufadice.
MATITE BLU_ Fai di matite blu. Prin pont: pussibil che un program par furlan si vedi di clamâ «CarniaNews»? Secont: ducj i sottitui a son par talian. Ducj. Tai titui di code, invezit, al compâr parfin un «Region» al puest di «Regjon». Ma la Arlef no varessie di soreintindi? E la vere sorprese e rive ae fin de trasmission, cuant che si à di subî la «leccatio»: il president Lino Not (o l’assessôr) che al ringrazie i telespetatôrs, la gjornaliste, il politic di turni. Ma ringraziâ di ce, se al è il so ent che al paie par vê chê trasmission?
FINANZIAMENTS_ Chest al è, a proposit, un altri pont debul. Sgarfìn, par capî cetant e cemût che il program al ven finanziât. Il progjet de Comunitât montane de Cjargne al à vût i finanziaments de Regjon, in gracie de leç 482/99, pal an 2006. Inserint te vôs «comunicazion istituzionâl», di vie Sabbadini a Udin si domande che il spazi informatîf al sedi ricognossibil e che il formât al sedi standard tai contignûts, tal lengaç e te cualitât. Par «comunicazion istituzionâl», si intint la erogazion di un servizi informatîf sui progjets e su lis ativitâts dal ent.
La produzion e je stade dade ae Piemme Spa, concessionarie di Telefriuli. Duncje, i spazis a son a paiament e no si trate di trasmission ordenariis. La emitent di Tavagnà – che e à garantide la metude in onde in prime serade e la repliche – e à cedût i dirits di trasmission aes emitents «Telealtobut» di Paluce e «VideoteleCarnia» di Trep, che ancje chês a àn cjapât cualchi franc par ritrasmeti. L’impuart complessîf al è di 20 mil euros al sporc, par 30 notiziaris (dîs mil euros al è stât invezit il cost dal zimul radiofonic, vâl a dî 22 trasmissions produsudis di Onde Furlane). I conts a son subite fats: beçons! Ogni minût di trasmission al coste sù par jù 111 euros. In Fevrâr a son finidis lis ultimis pontadis. Se a àn di tornâ a fâ la trasmission, sperìn che a tornin a viodi la formule.
UN IMPEGN CHE AL MARAVEE_ Cemût mai la Comunitât di mont de Cjargne – che no si è mai interessade al furlan cuntun progjet seri, fale cualchi libri e publicazion, – si imbarcje intun program pe television? Dal sigûr, in vie Cjargne Libare no si è mai fate, ni si à mai crodût, intune politiche sistematiche pe marilenghe. Par esempli, in ducj chescj agns, al ent sovracomunâl no si è nancje mai imbastît un sportel pe lenghe furlane, di riferiment par dut il teritori. A jessi triscj si podarès pensâ che il stimul al sedi stât dome chel dai bêçs, viodût cun di plui che la cualitât e clope.
OSCAR PUNTEL