CULTURE – LA FABRICHE DAI… LIBRIS. Romanç in 3 riis, edizion 2011

Cemût ise lade?
La seconde edizion e je lade une vore miôr di chel atri an soredut dal pont di viste de cuantitât, a son rivâts materiâi in dutis e dôs lis sezions.
Ce novitâts?
Prin di dut la introduzion de maiute firmade di Altan e i premis culturâi e ancje utii a chei che a àn a ce fâ cu la scriture: un i-pad e un i-pod.
La novitât plui grande e je stade chê di vê sperimentât une sezion sms. In chest an si voleve meti ae prove ancje il celulâr come mieç di scriture creative e no dome come imprest di comunicazion di masse.
Cemût ise lade cui sms?
Si è podût notâ une divierse cualitât pai materiâi inviâts par sms. Il media in chest câs nol è stât un sempliç contignidôr neutri ma al à influençât il stîl de scriture pandint une tindince a rifleti in maniere plui direte plui libare che tindeve plui al aforisme e ae poesie pluitost che ae struture, ancje se in curt, di un romanç.
Ce belanç fasêso?
In gjenerâl o sin contents, o vin vût plui partecipants dal an passât ancje cence considerâ il fat di vê ampliât il concors introdusint une gnove modalitât di spedizion dai materiâi la cualitât no je stade in medie alte come l’an passât.
Ce utilitât aie cheste iniziative?
Une vore util ae lenghe furlane par vie che al introdûs un sfuarç ae sintesi che al rivedi a concentrâ dute la fuarce dal significât intun pugn di peraulis par rivâ a incjantâ il letôr in pôc spazi. Chei che ancje chest an a àn vinçût a àn chest savôr tes peraulis, cheste maestrie, segn di vê cjapât sul seri un compit che, ancje se nol somearès, al è impegnatîf.
E pal avignî?
O cjati util la continuazion di chest concors ancje come stimul origjinâl di svicinament aes lenghis, o soi convint che in furlan si vedi di tentâ di fâ robis gnovis che a podedin sei un esempli ancje pal studi e stimul a doprâ altris lenghis.
I ten a dî che il concors al à une nature sperimentâl di fonde e alore al sarà simpri diviers sot cualchi aspiet ogni an di maniere di cjatâ cul timp un formât ideâl al so fin di promovi e stiçâ la int a doprâ il furlan in maniere artistiche e creative par puartâ cheste lenghe ancje in lûcs gnûfs cun tecnologjiis di ûs comun par cirî di rompi chei confins di prejudizi sul ûs de nestre lenghe.
Un ultin messaç?
Us saludi cun cheste biele massime di Voltaire: “Preseade siore, se o ves plui timp i scrivarès une letare plui curte”.
Maurizio Biasizzo