CULTURE – Il pari de Universitât furlane

Cent agns indaûr al nasseve a Sant Zorç de Richinvelde, ai 29 di Març 1910, Tarcisio Petracco, considerât il pari de Universitât dal Friûl (muart a Udin, ai 5 di Zenâr 1997). Di famee di puars contadins, tal 1920 al piert la mari e a 16 agns al à di molâ i studis e lâ a vore, ma al continue di bessôl a studiâ, rivant a la lauree in Letaris a Padue. Dopo dai 8 di Setembar dal 1943, al va a insegnâ grêc e latin a Cividât e al devente ancje partigjan clandestin. Dal 1947 al tache a insegnâ al liceu Stellini di Udin, ma, no rivant a mantignî la famee, e par no cirî ricompensis pe lote partigjane come che vevin fat altris, tal 1949 al emigre in Canadà, dulà che al scuen lavorâ come muredôr e lavorant. Al torne in Friûl tal 1955, e al insegne fin al 1975 latin e grêc al Stellini di Udin.
UNE BATAIE PENZE_ Dal 1972 al è a cjâf dal Comitât pe universitât furlane, un obietîf che in regjon i conseîrs furlans no aprovin, par no «danezâ la unitât de regjon». Si decît duncje di fâ une propueste di leç popolâr, par passâ parsore de opinion contrarie de regjon. Ancje chest al falìs e si scomence tal 1976 a tirâ sù firmis par une grande petizion. Ai 6 di Mai di chel an al rive l’orcolat a sdrumâ il Friûl, ma di chê tragjedie e torne fûr plui fuarte di prime la domande par une universitât dal Friûl. Finalmentri, ai 8 di Avost dal 1977, inte leç pe ricostruzion, e ven includude la universitât, dongje a fuarts contribûts pe universitât di Triest, pûr no tocjade dal taramot. Ancjemò no jere previodude la facoltât di Medisine; tal 1979, e partìs une universitât fantasime cun risorsis e personâl che no jerin vonde pes esigjencis di cui che al veve di scomençâ di nuie. Dopo altris agns di lote, tal 1982 e rive finalmentri la facoltât di Medisine, ancje se pe aplicazion de leç si scugnarà spietâ fin al 1986 pe oposizion fuarte dal Ordin dai miedis. Ai 7 di Fevrâr di chel an e ven ancje metude jù la prime piere dal pôl sientific de Universitât, ai Riçs, lassant invezit tal centri de citât lis facoltâts umanistichis. E je finalmentri in vore la Universitât dal Friûl.
Redazion / Vichipedie