Sfuei Mensîl Furlan Indipendent
Archivi de Patrie

CULTURE – IL FERÂL. La lezion de storie

............

Il 23 di Avrîl nus puarte chest an al tierç aniversari de muart di pre Antoni. O pensìn che la maniere miôr par ricuardâlu e sintîlu vîf e je che di continuâ a proponi lis sôs considerazions e i siei scrits. Cheste volte o lin a pescjâ intun dai argoments che nol à mai molât di frontâ, di spiegâ e di proponi pe cussientizazion dai furlans: il 3 di Avrîl. Date storiche e simboliche, come che ogni popul a ‘nd à une sô, che e varès ormai di jessi stampade dal çurviel di ducj i furlans. Di chei ponts di riferiment che a deventin pieris miliârs no par tornâ indaûr te nostalgjie, ma par cognossi il passât, imparâ la lezion pal dî di vuê e progredî.
pre Roman Michelotti
Te storie di un om, ducj i dîs a son bogns par nassi e ducj a son bogns par murî. Cussì te storie dai popui. Dîs e agns e secui un daûr l’altri, un compagn di chel altri, toc sù toc jù.
Po dopo e capite chê zornade, chel fat, chel alc che al segne, che al divît, che al distine, che al reste sicu cunfin jenfri doi tocs. E si dîs «prin» o «dopo» di chest. E pues jessi une robe brute, usance un taramot o une invasion e une vuere; o ben une robe biele, usance il nassi di un gnûf stât, une albe gnove di libertât, une autonomie che e cjonce une ete di sotanisim.
Salacor, ai trê di Avrîl dal 1077, cuant che l’imperadôr Rico IV, cui siei gastalts e cancelîrs, i à segnade al patriarcje Sigjeart la nomine a duche de «Patrie dal Friûl», si son visâts dome lôr di ce che al jere sucedût a Pavie. l furlans, chenti, in chê zornade a àn fat ce che a vevin fat la dì prin e che a àn continuât a fâ la dì dopo: lavorâ, scombati, preâ, porconâ e vie. E pûr chê date e reste impuartant, cun dut che no le àn segnade sui libris uficiâi des scuelis nostranis.
Plui che contâ ce che al è sucedût, forsit al è ben viodi ce che si pues rigjavâ di un fat lontan tancj e tancj agnoruns e capî ce che la storie e pues insegnânus ancje in dì di vuê.
Massime tai moments plui grivis, si à di cjalâ indaûr par cjatâ une fonde, une lidrîs, un spieli, une reson dal nestri mût di jessi, di vivi e di capî la vite, dal nestri jessi e restâ furlans; ni miôrs ni piês di chei altris, ma diferents sì. E chest si cjatilu dome tornant indaûr pal troi de storie che, se e je mestre, e varà ben di insegnânus alc.
Ma parcè tirâ fûr chescj cantins aromai lâts in dismentie? Parcè che une fuee e à il parcè di esisti dome se e je peade tor dal ramaç e il ramaç tor dal arbul e l’arbul al è inlidrisât te tiere. II sverdeâ de fuee, adalt, al dipent di cemût che a son lis lidris, abàs. Se no capìn nancje chest, o podìn sierâ ducj i libris, di cualunche popul. E no si pues vignî fûr che la storie di un e je sflandôr e chê di un altri nostalgjie o matetât o massepassuderie. La storie e je simpri sapience e il cognossile par contâle ai fîs e ai nevôts e je la prime garanzie par che une int e vadi indenant. La glagn de storie e ten sù la vite di ogni om che al nas, che al scombat e che al mûr. Nol esist l’om cence storie parcè che la storie e spieghe il popul e il popul al spieghe la storie.
Alore, tornant un pont indaûr, ce imparìno di chei timps lontans che ogni an nus rapresentin ce che o sin stâts par vieri?
Une prime robe e je che i grancj si impensin di vê cussience, par solit, cuant che ur torne cont a lôr. L’imperadôr o sì o no che al jere afanôs pe libertât dal popul furlan, ma i cunvignive tignîlu bon in chel moment. Cuant che no ur conven, cu la stesse calme, a disfin ce che a àn fat. Mai stâ fidâts, duncje, sun lôr; nancje vuê! Ce che a molin, lu fasin par sanscugnî e tal tornin a strafuî sot vie, par no che tu deventis masse fuart e che tu ur fasedis pôre. Al è il bombon par che il frut al finissi di blecâ e di frignâ. A son i confets dai grancj, che plui a son dolçs par di fûr e plui si viôt che a son mareants par dentri.
La seconde e je che une robe, ancje biele, no à tignince se no le judìn a stâ sù. Une libertât regalade e je une false libertât. Tocje vuadagnâse e no si è mai sigûrs. Cuant che plui si è sigûrs al è il moment di vê pôre. Nissun popul nol è sigurât cuintri dai sinistris de storie e par chê scjale che si va sú, par chê stesse scjale si torne jù. Scombati simpri pe libertât, cence inlusions; durmî dome cuant che si scuen, e cuntun voli viert. E no fidâsi nancje dai cjans di vuaite. Baste un bon vues e si svein te sgjaibie o si cjatin te panze dal lôf.
E cui lôfs si rive a la tierce robe che la storie nus insegne. E je tant vere che e je jentrade ancje tes contis dai nonos ai nevôts (chei cuatri che a son restâts a contâ e chei che a àn la furtune di podê scoltâju), vadì tal grant sac de sapience umane.
II lôf al è grant dificil che al buti jù lui la puarte dal cjôt. Al rivarès, si sa, ma e sarès une robe masse orende. Alore al devente vuait: al fâs di dut par che a sedin i agnei a vierzii la puarte, par dentri. Cu la sensarie di cualchidun paiât par spiegâur, ai agnei, che a àn dute convenience a vierzi la puarte, a vierzisi. Dal 1420 Vignesie no varès podût rivâ a paronâ il Friûl se cualchi bon furlan no i ves preparade la strade. Dal 1866 la ltalie no varès podût cjapâ il Friûl cence lis propagandis dai solits liberâi progressiscj, che a zirin daûr che al tire l’aiar e ancje cuant che no ‘nd è aiar. A vevin di fânus cerçâ la civiltât «fatâl» taliane. Dopo de vuere, di cheste, o varessin podût vê une autonomie compagne de Valdaoste e dal Trentin-Sudtirôl, se no vessin vude la passion osteade dai partîts de catolicitât e de romanitât, che a vevin di salvânus des svintadis che a sbueravin par di sore e par di là.
Fermìnsi culì, a pensâ. E no stin a dâi la colpe simpri a la int, che e vûl jessi cussì. A vuelin cussì parcè che ur àn mostrât in ducj i intonos che al jere dut ce vuadagnâ a fâsi sassinâ. Po dopo si son cjatâts ducj compats tal cimiteri dal Friûl: i predis a preâ par talian e la Filologjiche a piulâ, cun compagnament lami de bande inteletuâl di ogni ordin e schirie.
Par chei, però, che a àn ancjemó une ponte di anime furlane e che a vuelin riscatâsi e ripiâ il sflandôr de storie, une sole strade: scombati fin tal ultin cence rassegnazion o compromès di sorte. Cuintri la religjon dal sbassâ il cjâf, provâ la religjon dal doprâ il cjâf e, se al covente, ancje il racli. Frontâ une muart «rabiose», come che al à scrit Pasolini in merit dai Turcs che a crodevin di scancelâ par simpri il non e la muse dal Friûl. E a ‘nd é cristians, ancje in dì di vuê, che no àn lafè nuie ce imparâ, in fat di inicuitât, dai Turcs de storie. Dut a glorie di Diu e pal progrès dai popui.
PRE ANTONI BELINE
Editorâl di La Patrie dal Friûl di Març dal 1980, n. 3

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +