CULTURE – ART-Â. Dino, Mirko e Afro Basaldella a Passarian

Dino, Mirko e Afro Basaldella insiemi intune grande retrospetive a Vile Manin di Passarian a plui di vincj agns di distance di chê fate de Galarie di art moderne di Udin, tal 1987. L’obietîf al è chel di inzornâ chê mostre cu lis scuviertis seguitivis e di presentâ cualchi inedit di Afro e di Mirko. Une biele oportunitât di vignî a bon sui plui grancj artiscj dal Nûfcent furlan, che, tai agns, ur son stadis dedicadis plui rassegnis.
La esposizion di Passarian – «I Basaldella. Dino, Mirko, Afro» –, volude de Regjon e de Aziende speciâl Vile Manin e inmaneade di Linea d’ombra, e je curade di Giuseppe Appella, Fabrizio D’Amico e Marco Goldin. In mostre 168 oparis, massime pituris e sculturis, che a rivin des plui grandis colezions publichis talianis, de Galarie nazionâl di art moderne e contemporanie di Rome ae Gam di Turin, di colezions privadis e de parintât dai artiscj, massime i lavôrs dai agns Trente e Cuarante. A contin, daûr di un criteri cronologjic, dute la vicende artistiche di Dino (1909/1977), Mirko (1910/1969) e Afro (1912/1976), fîs di Leo, pitôr decoradôr udinês, e nevôts dal oresin Remo: dai esordis a Udin te suaze de Scuele furlane di avanguardie, nassude cun chê di inzornâ l’ambient artistic furlan, ai agns passâts a Monze e a Milan, a chei a Rome, dulà che Afro e Mirko a forin a stâ, ancje se a tornarin dispès in Friûl, fin ai agns de maturitât e a chei plui tarts.
Clâf di leture origjinâl e je chê di leâ in maniere critiche la opare dai fradis Basaldella, ancje dal pont di viste espositîf, cu la pussibilitât di confrontâ sculturis, telis, dissens par stazânt analogjiis e diviersitâts.
Il spetatôr al pues viodi oparis plui e mancul cognossudis, ma ancje mai esponudis, tant che un ritrat in cuet dal pitôr roman Capogrossi, modelât di Mirko tal 1939 e trê oparis di Afro – un ritrat di Lina (1937/’38), un autoritrat dal 1934 e une piture, «Borc Sant Lazar», dal 1938. Cualchi toc al è piturât su dutis e dôs lis bandis, tant che al usave fâ Afro.
La mostre e restarà vierte fin a domenie ai 29 di Avost (di martars a vinars des 10 di matine aes 7 sot sere, sabide e domenie des 10 di matine a 8 di sere). Informazions e prenotazions al numar 0422/429999 o scrivint une mail ae direzion: biglietto@lineadombra.it
Erika Adami