I sants Ermacure e Furtunât ju ricuardìn no pes disgraciis che cualchidun al vûl atribuîur te setemane che e cole la lôr memorie, ma parcè che a riclamin la nestre storie, la nestre identitât. Pre Antoni ogni an tal mês di Lui al presentave une considerazion, un pinsîr, un aprofondiment sul valôr di cheste solenitât. O riproponìn chest articul vonde resint, ancje parcè che al riclame il messâl par furlan pront e che, par un at che o ritignìn scandalôs e vergognôs, al è ancjemò in spiete de aprovazion uficiâl. No sai se chês autoritâts che a vevin di concludi la vore si son dismenteadis. Nô no si dismentearìn.
pre Roman Michelotti
O sin fra chei che si ustinin a cjalâ une persone e un popul inte sô integritât globâl, cirint di capînt i aspiets plui svareâts par capînt la ricjece e la peculiaritât. No si trate di une vision dal mont romantiche o spiritualistiche ma serie, la uniche che nus permet di svicinâsi cun rispiet e cun profit a chel misteri che al è la persone e il popul. Cussì ancje te ete postmoderne e posttecnologjiche, che e à viodût a colâ dutis lis categoriis classichis e a saltâ fûr catalogazions e parametris inedits e di dificile comprension e interpretazion, o ritignìn impuartant, ancje se no unic, l’aspiet religjôs di une persone e di un popul, intindint cu la peraule «religjon» dut ce che ju pee fra di lôr tal cjamp dal spirt, dut ce che ju pee fra di lôr te ricjerce di une lidrîs condividude e convivude e dut ce che ju pee fra di lôr te ricercje di un sens, di un progjet, di une sperance, di une tension, magari di une ilusion che ur permeti di lâ indenant seont une direzion. Aquilee, par nô furlans, e pai popui saltâts fûr dal so grim tal cors variegât e tormentât dai secui, e fâs part di chest percors, di cheste ricercje, di cheste ricjece condividude, di chest pont di riferiment e di orientament. E l’avôt tradizionâl dal mês di Lui, a celebrâ la memorie dai sants Ermacure e Furtunât, fondatôrs e protetôrs de glesie di Aquilee, al jentre in cheste suage. Lâ, tornâ a Aquilee no duncje par riparâsi tune nicje alienant o spiritualistiche e superstiziose di int che no sa e no si rassegne a vivi e a confrontâsi cu la secolaritât e la razionalitât e la complessitât di vuê, ma come int che e met dute la sô passion, inteligjence e cûr, par inlidrisâsi e insedâsi tal mont di vuê e cul timp di vuê.
Ma chest an o volaressin dâi al nestri pelegrinâ un percors e une intenzion particolârs, chei de preiere, intindude no tant come preiere personâl che e à nudrît la devozion e l’anime popolâr, ma come preiere liturgjiche, vadì la preiere coletive, corâl dal nestri popul. Parafrasant la detule: «Disimi cemût che tu preis, e ti disarai cui che tu sês», o ritignìn che ancje il popul furlan, come ancje il popul sclâf e todesc e talian e ducj i popui, al vedi une sô maniere peculiâr di viodi e di vivi il so rapuart cu la divinitât. No rivi a dî, come che cualchi sturnel al à volût fânus dî, che «Diu al è furlan», ma o soi convint che il Diu dai furlans al à la lôr muse e filusumie e filosofie, la lôr concretece e scletece, la lôr essenzialitât e serietât. Mi plasarès di podê dî che al è un Diu che nol cjape regâi e no si lasse comprâ e vendi e duncje un Diu e no un idul o un pipinot cence dignitât.
Tornant a la preiere de nestre glesie, i esperts e i passionâts di robis nostranis e di robis bielis in gjenerâl a san che il patrimoni aquileiês al jere di prime grandece in cont di liturgjie, di musiche, di tradizions e di finecis. E ancje se lis rapinis dal timp e chês plui dolorosis e scandalosis dai oms, comprendûts o partint propit dai oms di glesie ignorants e gjelôs, a àn dispierdût dut chest tesaur, alc al è restât te nestre memorie coletive e tal nestri subcussient. Lu prove il fat che, cjatantsi denant di un nestri aiar di glesie o di un fruçon di memorie religjose, il nestri voli inmò si inlumine e il nestri cûr inmò si incore. O sintìn che cheste e je robe nestre, al è il nestri aiar spirtuâl, la nestre aghe vitâl. Si sa ce stragjo che al è stât perpetrât tai secui, dal sflandôr de glesie subapostoliche e de ete di aur dai prins secui fint a la prime romanizazion di Carli il Grant e dal so famei e nestri conterani Paulin di Cividât, e po simpri plui, fint a la normalizazion drastiche e fanatiche dal concili di Trent o, cun plui precision, di un interprit ignorant e ridutîf o distrutîf come il patriarcje Francesc Barbar, par rivâ a la copete dai 6 di Lui dal 1751, cuant che la prepotence romane, veneziane e austriache, mascarade di finalitâts religjosis e di peraulonis che a distance di timp a san di blesteme, i àn molade la pache di gracie a un patriarcjât e a une glesie ridusude in fin di vite. Une operazion che mi à parût di dâi il non che si mertave: eutanasie.
Daûr di tante tristerie e ostinazion invelegnade, isal restât alc o no isal restât nuie? Al è restât il popul, il vêr protagonist, l’atôr e autôr principâl. Il popul furlan cu la sô lenghe e sensibilitât. E il popul furlan al à continuât a preâ miôr che al à podût, dal moment che si scuen tirâ flât. E nô i vin dade une man cirint un compromès che nus semee, pal moment, dignitôs. Acetâ il messâl roman ma voltantlu intîr e cun fedeltât inte nestre lenghe. Nol sarà, magari cussì no, il «messâl aquileiês» di splendide e patetiche memorie, ma il «messâl roman» che, a pâr cun chei altris popui dal mont, al po judânus te nestre preiere coletive. La vore, lungje e delicade, e je stade finide e metude adun tun prototip di rare finece, contornât de miôr produzion iconografiche nostrane. Une perle autentiche e rare. Lu vin presentât, compagnât cu la domande dai trê vescui des diocesis dal Friûl, a la Conference episcopâl taliane, par che lu consegni e lu racomandi a la Congregazion dal Cult divin, competente in materie. La brame e je tante e ancje la premure. Parcè che il timp nol zuie in nestri favôr e o sin za masse in ritart, ancje se nol à dipendût di nô. Si sperave che, tal 30m dal taramot, e tal rispiet dai tancj pronunciaments papâi e curiâi sul rispiet des minorancis e sul valôr des culturis minoritariis, a vessin metût un fregul di plui passion. O, dite diferent, di sensibilitât e di cussience. Parcè che no si trate di pitocâ la caritât, ma di viodisi a ricognossi un dirit sacrosant tant dal pont di viste civîl che glesiastic. Dal moment che la leç taliane e ricognòs la lenghe furlane e che il messâl al è stât dât dongje seont ducj i crismis, di sigûr plui precîs e fedêl di chel talian, no si capìs il parcè di tante indiference, di tant meninfot, di tante presuntuose e stupide prevaricazion. Domandant di preâ, ur fasìno un dispiet? Sono metûts li par servî la religjon e judâ la int, a partî dai piçui e dai puars, o par servîsi de religjon e par fâ i lôr pastuts e pastrocjs cui grancj e cui prepotents? O ventijù esistino dome i dirits dai embrions e la antipatie pai gay e no i dirits dai popui?
Denant di un mont che, ancje chi di nô, si slontane simpri di plui de glesie e che nol cjate te struture catoliche chel calôr, chê umanitât, chê disponibilitât che al va cirint, o pensìn che e sedi rivade la ore di fâ mancul pronuciaments e documents e proclamis e plui ats concrets e coerents di serietât e di umanitât. Vonde cjacaris sul dirit e sul valôr des minorancis e plui rispiet par lôr, par dutis e duncje ancje par nô. Ur al domandìn ai nestris sants protetôrs ma ancje a di chei che si ritegnin la vôs autentiche di chel Diu che si è fat om pai oms e ultin pai ultins.
PRE ANTONI BELINE
Editorâl di La Patrie dal Friûl di Lui dal 2006, n. 7
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +