La capitâl catalane
La citât di Barcelone, cui siei trê milions di abitants, cu lis sôs stradis lungjis, ancje di 14 chilometris e dretis come sinis, cul so puart là che e rive e che e partìs int di ogni part di mont, cui siei palaçons che a palesin podê e ricjece, cu lis sôs gleseonis, cjamadis di art e di storie, cui siei cuartîrs come il barrio Gotic che ti fâs jentrâ in plene Ete di Mieç e subit dopo, cu lis costruzions di Gaudì, in plene ere futuristiche, e je sigurementri une citât grande, siore, biele e nete. Cence meti in cont museus, zardins botanics, zardins zoologjics, monuments, architeturis e sculturis di ogni timp e çate. Dome che un che al à vût stât par 14 agns a Val e Rualp e par altris 14 a Visepente, salacor al à tant fat il voli al piçul e la orele al cidin che nol è il plui adat e competent a judicâ chestis robis cussì grandis che ti inspirin plui sudizion che amirazion e comozion. Par chel, no ai masse simpatie pes metropolis e o preferìs un cjantonut in bande, là che si pues cjalâ cun calme il grant corîr de vite. Di dut chest mont in grant, o puarti a cjase la spassizade luminose sul puart e soredut la straordenarie ricjece artistiche e religjose de catedrâl, là che ogni capele e mertarès cjalade par une zornade interie. No ai rivât a contâ dutis lis statuis; o crôt però di vê contât almancul vincj Madonis. Cheste floridure di devozions a prin colp e pues dâti la idee di une floridure di religjon, ma jo le viôt come un impuariment, parcè che Diu al è unitât e plui si à confusion e plui si slontanisi di lui. E reste la ricjece artistiche, verementri uniche. O ai vût mût di viodi dôs glesiis che mi restaran pal cjâf pluitost in negatîf. La prime e je la basiliche de Sagrada Familia, une fabriche scomençade tal 1884 e no san nancje cuant che e finirà. La part primitive, dal secul passât, che e celebre i misteris de nassite e de infanzie di Jesù Crist, e je biele. La part ultime, che e celebre i misteris de passion, e à dut un altri stîl e no je cussì convincente. Al sarès biel podê viodi la tierce e ultime part, chê centrâl e plui imponent, par capî la confusion e la contradizion di une glesie, tacade intun secul e finide doi secui dopo, tacade framieç dai cjamps e finide framieç dai condominis di perifarie. Al è evident che, gambiant il contest culturâl, economic e antropologjic tor ator de glesie, e gambie ancje la glesie stesse, che e finìs cul jessi incomprensibil parcè che a son sparidis lis coordenadis religjosis e culturâls che le àn inviade. Al sarès come scrivi un libri vuê par int che lu leiarà fra doi secui. Chei che a àn dit che lis robis lungjis a deventin madracs no jerin interdets.
Al reste valit il tentatîf di une sperimentazion gnove e origjinâl dal gotic, par solit cussì ripetitîf e frêt tai simiotaments neogotics. La seconde glesie, sigurementri ancjemò plui discutibil, e je la basiliche dal Tibidabo, insom dal çuc o mont omonime. E je peade a don Bosco e si lu palpe a ogni cuadrel. A conferme di ce che o stoi disint di tancj agns: che i religjôs, che a somein universâi parcè che a invadin dut il globi, a son provinciâi par costituzion, parcè che a ripetin pardut lis stessis falopis e robis cence gust e cence culture. Ce che no i sucêt mai a di une glesie locâl, che, se ancje limitade come estension, e à la profonditât de storie e de culture e l’humus naturâl di un popul. Chest provincialisim lu vin provât cui francescans in Tiere Sante e lu vin tornât a provâ culì. In pratiche al sparìs Vecjo e Gnûf Testament e ogni riferiment liturgjic o teologjic, par lassâ puest ai mosaics cun don Bosco, che dal 1876 al cjape des mans de borghesie catalane i terens e i progjets de gnove fondazion, o cu la basiliche di Sant Pieri a Rome là che e varès di lâ a parâsi une nâf savoltade des ondis dal anticlericalisim e dal secolarisim. Tes lastradis, che in ogni glesie come che Diu comande a ripuartin senis biblichis o sants che a àn fate la storie de glesie e de umanitât, a son figurâts Piu IX, Leon XIII, Piu XI e Piu XII. Pape Wojtyla nol à ancjemò une lastrade par so cont. Al scuen contentâsi de solite lapide cu la solite frase subit imortalade prin che l’aiar o il timp le puarti vie, fasintle lâ in dismentie. Une robe penose cence fin. Lis dôs basilichis, daûr chel che o ai podût sancirâmi, no àn une fonde popolâr, eclesiastiche, ma a son nassudis par resons ideologjichis e contingjentis. La Sagrada Familia, nassude come templi riparadôr, e voleve rispuindi ae campagne di laicizazion che e veve invadût la Spagne dopo dal 1870, cu la ondade di anticlericalisim e la introduzion dal matrimoni civîl obligatori. Il Tibidabo al è nassût come templi votîf e riparadôr pe decristianizazion de Spagne par colpe des ideis socialistis.
La glesie e podeve parâsi dome strenzintsi al pape e cirint di puartâi vie ai socialiscj la part plui esponude: la zoventût. Di li o ai capît che no si à mai di doprâ la religjon par fâi dispiet a un altri. Diu al va adorât e servît, no doprât. Che se la int, te sô fantasie e ingjenuitât, e cjape un cjôt e a ‘nt fâs un santuari, chel al devente pardabon un santuari. Se invezit i predis, par resons lôr, a metin sù un santuari, chel al devente un cjôt. Sigurementri nol cjaparà pît. Baste viodi il Santuari de Madone Missionarie o di Monte Grisa.
pre Antoni Beline
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +
Nature e Ambient / L’unic che si à di crodiji cuant che al conte chê dal ors
Serena Fogolini
Stefano Filacorda, responsabil sientific pal grup di ricercje dal Ateneu furlan su la faune salvadie Un cors par imparâ a cognossi la faune salvadie des nestris Alps, cun lezions teorichis e pratichis su lis tecnichis di monitorament e di cature dai animâi, massime grancj carnivars, ungulâts e uciei.◆ Al è chest l’intindiment de Winter School […] lei di plui +