CULTURE – I Brass Folk a svolin simpri plui in alt

Dopo 12 agns a àn cambiât musiche e vistîts, no ju viodarìn plui dome a sunâ, cun armonichis e bombardinis, lant ator pes stradis e tra lis taulis des fiestis, ma ju sintarìn e viodarìn ancje a fâ spetacul (e il solit casin!) suntun palc, cuntune formazion slargjade e un gnûf repertori di cjançons.
Dopo i timps des staiaris e di «Svole» (cjançon di sucès rivade 5e al Festival de Cjançon Furlane dal 2003), i Brass Folk, la band itinerante che e à fat dal purcit il so simbul, a àn decidût di rinovâsi, cambiant gjenar di cjançons e dedicantsi a la disco music dai agns Otante, mantignint però simpri fuart il leam cu la lenghe furlane. Dutis lis cjançons di fat a son stadis liberamentri interpretadis e voltadis par furlan, dant cussì un sens ironic e spiritôs a musichis deventadis aromai famosis.
La sielte de lenghe furlane, nus contin i components dal grup, e je detade de volontât di mantignî vive la nestre marilenghe intun mont che al cambie di continui. Cussì, lis cjançons, pûr sunant ritmis di discoteche cognossûts, si caraterizin pe origjinalitât dal test dimostrant la ironie dute furlane tal contâ lis storiis.
Ma la novitât e je ancje une altre: al grup storic si è zontade ancje la vôs esplosive di Claudia Gobet che e à savût a dâ une note fuarte a la lôr musiche e al lôr mût di fâ spetacul. Oltri a rinovâ la imagjin de classiche formazion masculine la vôs di Claudia e salte fûr ancje pe sô interpretazion origjinâl dai  tocs.
Une biele sfide, nus contin chei dai Brass, al è stât ancje l’adatament metric dai compagnaments, doprant dome i struments in acustic cence componente eletroniche. I suns tipics dai campionadôrs e dai sintetizadôrs che si dopravin te disco music dai agns Otante a son stâts sostituîts dai suns dai tipics struments dal grup: armoniche prin di dut, bombardine e cuar.
Lis gnovis musichis dai Brass Folk si lis cjatin intal CD vignût fûr ai 9 di Lui di chest an e che al à par titul «80’s dance revival»; par vênt une cerce e cognossi lis datis dai lôr concierts si pues lâ tal lôr sît www.brassfolk.it.
Venusia Dominici