CULTURE – Drogâts… di zucar e furlan

Ju vevin lassâts cun “rabiôs”, “avonde”, “pulît”, “di lusso”. La prime edizion des bustinis di zucar in colaborazion tra Fantats furlans (fantats.splinder.com) e Friulpoint (www.friulpoint.it) a àn vût un sucesson che tu lis cjatavis in buine part dai ambients furlans, ancje dulà che no tu ti saressis spietât particolâr atenzion pe lenghe furlane.
Cussì chei dal FAF a àn decidût di replicâ, simpri poiantsi su la distribuzion dal Vivo Friuli che za chê altre volte al veve fât rivâ lis bustinis tai ristorants, bars e ostariis dal Friûl.
«Noatris che o drogâts di furlan, no podìn fâ di mancul di vê pes mans cualchi bustute… di zucar cu la scrite par furlan» a spieghin chei dal FAF «Chiste volte le vin pensate in maniere tradizionâl/popolâr».
Di fat il teme di cheste seconde edizion al è chel des detulis e dai proverbis furlans. Une iniziative che, grazie a la colaborazion cul grup di Facebook “Proverbis e detulis par furlan”, e je stade interative stant che i autôrs des scritis su lis bustutis a son stâts chei che a àn lassât une testemoneance tal web. Une maniere duncje ancje par stiçâ la int a cjatâsi te Rêt e recuperâ un aspiet de nestre tradizion che al riscjarès di pierdisi.
Ma lis novitâts no si fermin chi: di fat, di bogns “zucarparfurlan dipendents” la bustute no podeve jessi semplice: ancje il contignût al sarà particolâr, come che nus confermin chei dal FAF «Cheste volte le vin fate cun robe buine, cul zucar…. di cjane!»
Christian Romanini