Ce fâ vie pal Istât? Parcè no lâ par mostris? Une biele oportunitât par scuvierzi lûcs di incjant o artiscj furlans che a verin sucès ancje fûr dai confins de Patrie. Ve chi cualchi consei.
A Udin, palaç Morpurgo al da acet ae mostre dedicade a Marcello D’Olivo, che e valorize, in particolâr, doi moments significatîfs de sô poetiche architetoniche: il monument al milit no cognossût, tal cûr di Baghdad, che i fo comissionât di Saddam Hussein, e i progjets par Ecotown, citât ecologjiche pensade pal teritori tra Padue, Mestre e Trevîs, e mai realizade dal dut. In esposizion fotografiis, documents, dissens origjinâi.
La mostre MARCELLO D’OLIVO – BAGHDAD E ECOTOWN LIS IMAGJINIS DI UNE CITÂT PUSSIBILE e je vierte fin ai 18 di Otubar di martars a vinars des 3 daspomisdì aes 6 sore sere (la matine dome prenotant); sabide e domenie des 10 e mieze di matine aes 7 sot sere.
Simpri a Udin, li de Galarie di art moderne, in gracie di une selezion di trente pituris, si à la pussibilitât di cognossi la personalitât di une pitore paesiste scuasi discognossude, che e à vivût tra la fin dal Votcent e l’inizi dal Nûfcent: Maria Ippoliti. Nassude a Udin, e fo une des primis feminis a esponi su la sene internazionâl des Bienâls venezianis. E esponè i siei paisaçs, piturâts dal vêr, ancje a Praghe, Torin e Florence. In mostre, ancje oparis di altris pitôrs paisiscj, che a metin dongje un itinerari dedicât al paisagjisim a cjaval di doi secui. La esposizion MARIA IPPOLITI. UNE PIONIERE DAL PAISAGJISIM «EN PLEIN AIR» e je vierte fin ai 31 di Avost dal lunis ae domenie des 10 e mieze di matine aes 7 sore sere.
Se si à chê di fâ une biele gjite fûr des muris, si pues sielzi di lâ a Dieç, un borc di incjant tra lis monts de Cjargne, li che di tancj agns si inmanee ancje une mostre prestigjose, che e cjape dentri la int dal dulintor. Chest an, il teme al è une vore inmagant: APOCRIFS. MEMORIIS E LEIENDIS OLTRI I VANZELIS. Otante oparis mestris – pituris, sculturis, altârs e incisions –, de Ete di Mieç a vuê, a tirin sù il vêl di misteri che al par involuçâ i Vanzelis apocrifs, chei che no jentrarin tal canul des Scrituris Sacris, ma che a lassarin il segn inte tradizion iconografiche e devozionâl cristiane. In esposizion oparis di Bernini, Guercino, Dürer, Tintoretto e tantis altris. La mostre si pues visitâ des 10 di matine aes 7 sore sere, ducj i dîs, fale che il lunis, fin ai 4 di Otubar.
Di là de aghe, a Pordenon, no si pues pierdi la mostre HARRY BERTOIA 1915-1978. O DECIDEI CHE UNE CJADREE NO PODEVE BASTÂ, dedicade a chest furlan origjinari di Sant Laurinç di Voleson e traplantât tai States, che la plui part de int e cognòs pe cjadree Diamond, produsude de aziende americane Knoll: e ve un sucès cussì grant di fuscâ chel che di ancjetant, o plui grant, al fasè Bertoia in cjamps diferents. Par dâ cont de sô poliedricitât creative a son coventadis dôs sedis: il Museu Civic di art e i spazis espositîfs de Provincie. Lis oparis in mostre a dialoghin cun documents, fotografiis, videos ancje par contestualizâ i riferiments che il gjeni di Bertoia al cjapà forme, cence dismenteâ di sclarî il rapuart tra il designer/artist e la aziende Knoll. Lis mostris a son viertis fin ai 20 di Setembar, di martars a vinars des 3 e mieze daspomisdì aes 8 di sere, sabide e domenie des 10 e mieze di matine aes 8 di sere, la joibe des 10 e mieze di matine aes 10 di sere.
Si va insot tal leam tra ART, IMPRESE E TERITORI ancje te mostre omonime inmaneade tal sugjestîf cjistiel di Colorêt di Montalban, te suaze de rassegne «Maravee». Achì si à une selezion di videos di artist, comissionâts di cualchidune des plui prestigjosis aziendis talianis, comprendudis chês furlanis, tant che Moroso e Snaidero. Tal stes lûc, si pues visitâ ancje la mostre RELAZIONS ESTERNIS cun Michele Bazzana, Gaia Carboni, Elena Del Fabbro, Marina Ferretti e Andrea Kwas. Lis esposizions a son viertis fin ai 23 di Avost, dal lunis al miercus des 10 di matine a misdì e mieç e des 2 daspomisdì aes 6 sore sere; dal vinars ae domenie des 3 daspomisdì aes 7 sot sere.
Erika Adami
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +