IL FERÂL – Eutanasie culturâl

In chescj ultins mês e je saltade fûr la polemiche sul Grant Dizionari Bilengâl Talian-Furlan, curât dal Cif 2000. La denuncie: che al à costât masse, strassant cussì bêçs publics, che nol è ancjemò finît dopo 10 agns di lavôr, che al è dome su supuart informatic e no su cjarte… e vie. E, come al solit, i plui acanîts te polemiche a son propit i furlans, che si gjavin i cjavei e si bechin tra di lôr, intant che i nemîs e contraris al furlan a tetin. Si à volût, parfin, tirâ in bal ancje pre Antoni par dâ plui cuarde a la polemiche e plui reson a la critiche. Su chest cont Patrie dal Friûl e Glesie furlane a rispuindin in altre bande.
In cheste rubriche o volìn proponi un articul di pre Antoni, che al fronte ancje il probleme dal supuart economic, mieç no unic ma indispensabil, par difondi la culture, massime chê minorizade.
pre Roman Michelotti
Une detule paiane e dîs che «Carmina non dant panem», tant a dî che cu la poesie si mûr di fan. Une altre detule, dibot contemporanie, evangjeliche, le corêç disint che «L’om nol vîf dome di pan». E mai come vuê si à palpât cun man la veretât des peraulis dal Vanzeli. Cence pan no si campe, parcè che si mûr cul cuarp, cence poesie, art e culture no si campe instès, parcè che si mûr te anime e si reste vîfs dome par fâ di pipinots o di mus a di chei che ti sglonfin la panze ma ti disvuedin il cjâf.
Che in dì di vuê e coventi simpri di plui une fonde culturâl a son ducj dacuardi. Partant un investiment culturâl nol è mancul just di un investiment economic o industriâl. E al bute di plui, parcè che al rint par gjenerazions; anzit, al garantìs la continuitât creative e positive des gjenerazions. Dome un popul cun culture e cussience al pò sperâ intun avignî. Di fat i sistemis ditatoriâi e i stâts nazionalistics a copin il popul copant la sô culture, dineant la sô identitât fasintju sparî culturalmentri, moralmentri e, s’al covente, fisicamentri. Lu clamin «gjenocidi etnic o culturâl», che nol è mancul criminâl di chel fisic. Si lu dopre cui nemîs e cu lis minorancis. La Italie, dade dongje suntun implant nazionalistic, e à fat sparî, e duncje copât, il popul furlan e chei altris popui che a vevin une muse diferente. Mussolini, cu lis sôs farneticazions fassistis al à dome esasperât in maniere patetiche une malatie croniche dai stât talian. Scomparît Mussolini, l’implant al è restât. Che di fat, a 50 agns di distance, la republiche no à savût lâ plui in là de monarchie e de ditature.
Par dî il vêr si sint cualchi segnâl in sens federalistic. Si à capît, almancul a cjacare, che la unitât si le fâs rispietant lis stessis regulis e no fevelant dome la stesse lenghe. In cheste gnove clime, favoride di un gnûf contest ideologjic internazionâl, la nestre Regjon e à fat cualchi pas significatîf votant une leç pe lenghe furlane e riscjant di dâi une man par no che e sparissi in chest timp di massificazion gjeneralizade. A àn capît che ancje une lenghe e à bisugne di palanchis, come che un canai dal lat di tetâ. Senò al mûr. Se la culture no ti da palanchis, e à dibisugne di palanchis. No che cui bêçs ti vegnin lis ideis (a ‘nd è associazions che a strassin un disordin cence une idee), ma i bêçs a coventin pe difusion des ideis. Vuê ancje Dante Alighieri si tignarès la sô Comedie intal casselin se nol cjatàs cualchidun par fâle stampâ. E tratantsi di une robe lungje al riscjarès di jessi scartât a pro di une manifestazion di bandarots. Il discors al cole a pinel su la cuistion de culture furlane e di chei imprescj che la puartin indenant. Int che e lavore a gratis, ma che no pues paiâ ancje lis spesis materiâls. Il ricognossiment de Regjon al à tratât chest cantin e al à distinât une piçade di milions. Tancj rispiet al nuie di prime ma pôcs, se si pense ai talians di là dal confin. Nuie, se confrontât cu lis altris realtâts minorizadis europeanis.
Intâl spartî i milions la Regjon e à za fate une prime sielte discriminatorie. La Societât Filologjiche Furlane, par un esempli, si viôt ricognossude «une ativitât cualificade e continuative a nivel regjonâl» (art. 8 come 2 de leç 15/’96) e duncje e je sigurade cuintri di ogni pericul. E tire un slac di beçs al inizi dal an e duncje e pues programâ cun olimpiche serenitât.
Chês altris associazions, comprendude la nestre Patrie dai Friûl, che a fasin ativitât cualificade e continuative a nivel regjonâl, a scuegnin programâ cence nissune garanzie, fâ domande dentri dai 31 di Zenâr cu la ativitât za tacade, spietâ che l’Osservatori al decidi a mieç an il «tot», spietâ che la Regjon e deliberi in Avost chei bêçs che a rivaran l’an dopo. Intant però la associazion e à scugnût indebitâsi cu lis tipografiis e stâ fûr cu lis spesis de sede, dal telefon, de telematiche e dal personâl. Cui si sintial di lâ indenant e programâ cence nancje i bêçs dal an prime? E se no si programe tocje sierâ, parcè che un periodic al à scjadencis precisis.
La domande e je cheste. La leç ise fate par judâ la culture furlane o ise stade studiade par fâle sparî in maniere galiote? Ise fate par judâ chei che a àn simpri stât ben o par vignî incuintri ai piçui? Parcè no si puedial pensâ a meti sul stes tratament ducj chei che a fasin la stesse «ativitât cualificade e continuative a nivel regjonâl»?
Il stât talian si è disonorât cu la sô politiche di gjenocidi culturâl. No volaressin che la novitât de politiche regjonâl e fos tal sostituî l’etnocidi cu la eutanasie. Copâ cu la sclope al è criminâl, ma nol è miôr sierâ la spine dal ossigjen par che il malât al tiri i sghirets. No volìn pensâ a tante tristerie. O sperìn e o spietìn che i fats nus judin a lâ indenant cun sperance, savint che la muart ancje di un piçul imprest di informazion, par un che al à pôc e nuie, e je un vueit incolmabil e un dam cence rimiedi.
pre Antoni Beline
Editoriâl di La Patrie dal Friûl n. 1 di Zenâr 1999