Chest al è un siôr libri, preseôs pe sô vieste grafiche e pal contignût. E ancje pe sielte di fâlu bilengâl: fin a pagjine 195 al è par talian e lis seguitivis, fin ae 338, a son la traduzion furlane.
Su cuasi ogni pagjine une fotografie, une mape, une viodude aerie. Si podarès definî il libri une sume de storie di Aquilee, de etât preistoriche fin in dì di vuê.
In plui de introduzion dal sindic Alviano Scarel e di une tabele cu la sucession di ducj i vescui di Aquilee, a son sîs articui, ducj pençs e interessants.
Giulia Mian e Cristiano Tiussi a fevelin di Aquilee inte antighitât, no partint dal 181, an de fondazion, ma ben di prime, par vie che i prins reperts a van indaûr fin ae etât dal fier. I doi studiôs a cirin di dânus une idee ancje di ce maniere che a viveve chê int di tancj secui indaûr. E nus fevelin des stradis, de economie, des cjasis privadis, des termis, e v.i.
Renato Jacumin al interven cun doi articui: un su lis lidrîs e il disvilup dal Cristianisim e chel altri su la etât moderne.
Al è aromai acetât di ducj i storics che al è plui coret fevelâ, pai prins secui, di Cristianisims, al plurâl, pluitost che di un sôl Cristianisim. Chel di Aquilee e jere cence mancul une dai plui vierts e cosmopolîts. Ancje par vie che la citât stesse e jere cosmopolite: e veve colegaments regolârs cun Alessandrie di Egjit ogni pâr di setemanis. La storie di chei timps si pues leile in chê straordenarie testemoneance che a son i mosaics de basiliche. Mosaics che nissun al cognòs miôr di Jacumin, par vê dedicât agns e agns a chest studi. Il saç al cjape in esam ancje i rapuarts cun Grau, lis figuris dai martars, la ‘rusticitas’ aquileiese, il schisme dai trê Cjapitui.
Il secont saç di Jacumin al fevele de decjadence de citât, a scomençâ dal 1420, cuant che Vignesie e ocupà il Friûl: lis invasions, lis vueris, lis bonifichis taresianis, la ete napoleoniche, chê austriache, par rivâ fin al prin cricâ dal socialisim, cun personaçs tant che Tuntar, Tonet, Minut.
Gabriele Caiazza (che za al veve curât la vore Spazi del fare – Obmocˇja tradicionalnih dejavnosti, I luoghi della produzione tra la bassa pianura friulana, il Carso e l’Istria slovena, Tierç di Aquilee 2006. Viôt La Patrie, numar di Mai dal 2009) si ocupe de Ete di Mieç. E al scomence cul fâ viodi in ce maniere che e je distuarte une vision di cheste ete tant che ete di decjadence complete. Par Aquilee, po, se no si pues dineâ la decjadence, causade dal abandon che e je stade lassade la citât dilunc dai secui.
Maurizio Puntin al fevele de toponomastiche dal Comun e des ipotesis fatis par cjatâ la origjin dal non di Aquilee. Ancjemò une volte si viôt tropis siencis che e va a tocjâ la toponomastiche!
L’ultin articul al à la ambizion di fevelâ dai nestris dîs. Ludovico Nevio Puntin, par tancj agns sindic di Aquilee, al sa ben di ce che al fevele, e il so intervent al à il mert di sei une vore obietîf e di no colâ inte cronache.
Mertorie, sicu che o vin dit, la vieste bilengâl de opare. Ma salacor un pocje di plui atenzion no sarès lade mâl: a pagjine 138 si fevele dal pape Benedet XIV che a pagjine 288 al devente XV; si cjate scrit comerci (pagj. 226), ma ancje cumierç (pagj. 235); a mancje cualchi -s dal plurâl; a pagj. 291 al tradutôr i scjampe une ‘ria dopo ria’, che al è furlan di Aquilee, no coinè; l’adietîf possessîf al svarie jenfri soi (pagj. 247) e siei (pagj. 292), e v.i.
Ma no cate chescj difiets, un siôr libri. Al ven di domandâsi se i Comuns, scjafoiâts di tais dal Stât, a varan ancjemò la pussibilitât (e voie) di metisi in vore par oparis di chest nivel.
Laurin Zuan Nardin
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +