CULTURE – ART-Â. Lis stradis de anime di Franco Maschio

Al è impussibil no jessi tacâts de positivitât e dal entusiasim di Franco Maschio, il scultôr dai fruts che si rimpinin sui scois a Caorle, dal gjigant ungaretian a braçs vierts che si “ilumine di imens” a Sante Marie la Lungje, des mans che si alcin viers il cîl  tal “Dal profont a ti o sberli o Signôr” tal domo di Vençon – omaç aes vitimis dal taramot –, dal paiasso tal plui biel parc di Montecarlo. Franco al è un om realizât. Tal lavôr e te vite. Al baste cjalâlu. E pensâ che il so percors di artist al è partît a planc e cun tantis dificoltâts. Diplomât al “Malignani” di Udin, 22 agns indaûr, cun femine e doi fruts piçui, Maschio al molà il so puest di vore di tecnic metalurgjic ae Pittini di Osôf par secondâ la sô vocazion: la art. Ae fonde de decision une passion fuarte e tante determinazion e, massime, il supuart de famee, amatissime, che il scultôr al à simpri iniment. Se vuê al vîf di art e al è preseât e amirât ancje fûr dai confins de Patrie, al è mert di cui che i sta dongje. Emotivementri e fisichementri. I siei cjârs, di fat, a vivin cun lui inte cjase/laboratori di vie Udin, ae jentrade di Maian, vignint di Farle, tal mieç dai cjamps. Al è li che al da anime a pieris e çoncs. Nuie di impuartât. Franco al lavore dome materiâi locâi: de piere piasentine a cjastinârs, noglârs, morârs o cuargnolârs di chenti. Une sielte che e marche il leam, fuartonon, cun cheste tiere. Lui che al è “di raze Piave”. I siei, di fat, a son rivâts di Trevîs. Ma «jo o soi nassût achì, o soi furlan e o tabai furlan», al marche. Franco al sint di apartignî a cheste tiere. Lu dîs a clâr. E, cu la sô art, al à voie di rapresentâ chel sens di apartignince, di rapresentâ une comunitât, chê furlane, ancje par «sburtâle a alçâ il cjâf, a cjapâ cussience di ce che e jê». Ancje par chest e par “elevâ” i furlans, e je nassude, tal grim de famee Maschio, la idee di meti in pîts une oasi artistiche a Maian, dongje dal laboratori di vie Udin: un lûc che no dome al dedi acet aes oparis dal artist, ma che al sedi bon di trasmeti a fruts e grancj il sens dal biel.
Piere, len, metal. La materie e cambie, ma no la intensitât che a trasmetin lis oparis di Maschio: incuintris di maris e di fîs sospindûts intune lûs di inocence, personaçs che a polsin o che a pensin, evoluzions di atletis e balarins invuluçâts di fîi dinamics, abraçs tenars di inamorâts zovanissims, tors di personis che a van sù in alt viers l’infinît e che si tegnin strentis cun mans sproporzionadis rispiet ai cuarps. A son grandis a pueste. «Ce si fasie cence mans?» mi dîs l’artist maianês, contantmi di cuant che, picinin, al fasè un pipinut di ciment e, braurôs, lu mostrà a so pari, che i domandà dulà che al ves cjolt il ciment. «Ti tai lis mans!», i disè, scuvierzût che lu veve robât ai muradôrs. Chel amoniment, Maschio lu à simpri vût iniment, viodût che lis mans a son ancje l’imprest de sô creativitât.
Franco al cjale la nature e le invide a creâ cun lui. Al mude lis pieris in bestiis. Al vierç i arbui par liberâ il Crist in crôs che i àn dât acet par agns. Al gjave fûr di lidrîs musis e figuris di tension rare. I cuarps a son suts e sfilâts, par dâ il sens di moviment. Colôrs, ruspidecis e venis de piere e dal len, che a dan un efiet pitoric di no finît, a contin oms e feminis, lis lôr storiis, lis lôr faturis e lis lôr debolecis, lis lôr emozions. A ricorin i temis de maternitât, de caritât, de solidarietât, de atenzion a chel altri, che a rivin dal didentri dal artist. Messaçs che a nassin dal cûr e che a fevelin al cûr di cui che al cjale lis sôs sculturis.
Erika Adami