CULTURE – LA FABRICHE DAI… LIBRIS – Leonardo Zanier, Libers di scugnî lâ

Lassâ / la famea / la cjasa / il beârz / l’ostaria / i amîs / las pedradas / un cîl da sisilas / i odôrs / di una vita.
Bussâ / la femina / i fruz / ridint / plens di poura / di mètisci / a vaî / e po’ lâ / cun corieras / e trenos / lontans / dulà che l’âga / à un âti savôr / e no san fâ / la polenta / e il vin / nol sa di nuje / e la int / a à pressa.
Lenart Zanier al à scrit lis miôr poesiis che mai a sedin stadis dedicadis al teme de emigrazion. Stagionaj (che o vin citade) e je tirade fûr di chê opare fondamentâl che e je Libers di scugnî lâ, racuelte di poesiis scritis intai agns 60-62 dal secul passât (publicade di Garzanti intal 1977).
Zanier, lui stes emigrant par un ciert periodi, al à ancje studiât il fenomen de emigrazion dal pont di viste sociologjic e storic, stant che al è un inteletuâl complet. Ma i viers culì parsore a son poesie pure e pardabon no si podarès dî miôr di chel moment, il moment dai salûts di un om che al scuen lâ. Il poete al rive adore a cubiâ la violence de denunzie des injustiziis sociâls che la emigrazion le permetin, cu la rapresentazion liriche comovude e misurade dai sintiments des personis che chei sintiments ju provin.
Ma Zanier al sa ancje tocjâ altris cuardis: chê de ironie che e rive adore a demistificâ i mîts fats sù a la buine, cuant che no son propit inventâts dal dut par fâ stâ buine la int. E cussì al sucêt che l’alpin di bronç di Comelians al devente un tricul tracul pai fruts (la canaja…) o che Capo retto al sedi la sequence logjiche di Risorgi mento.
O che un sant, Sant Martin, al sedi viodût cun voi gnûfs, voi une vore critics, e no plui chei de venerazion. Al è il teme di une poesie famose di Zanier, musicade dal Cjançonîr di Daêl ancjemò intai agns dal ’70. E culì test poetic dissacrant e musiche (di Gianni Iustulin) a cjatin une armonie straordenarie par dâi vite a un piçule grande opare mestre.
Sant Martin, come che si sa, al è deventât famôs inte iconografie popolâr pal at di gjenerositât a rivuart di un puarin plen di fam e frêt che il sant i regalà un toc de sô mantiline. Zanier nol viôt cuissà ce tante gjenerositât in chest at. E al met il dêt su la plaie: facil di fâ la limuesine, dâsi une slavassade a la cussience, cul tirâ fûr une palancute che nancje no si nacuarzìn di vêle o no vêle. E i svuizars a àn mitude la imagjin di Sant Martin sui lôr biliets di bancje. E ducj o savìn ce che e vûl dî la peraule “bancje” pe Svuizare. E cheste caritât e domande di spindi “doi par dâ e trê par fâlu savê”. Insome dut il contrari di ce che al diseve il Vanzeli…
Laurin Zuan Nardin