Sfuei Mensîl Furlan Indipendent
Archivi de Patrie

CULTURE – ART-Â. Il cuarp che al fevele de mari tiere

............

E lavore sul cuarp – un cuarp grotesc e puartadôr di cicatrîs che a fevelin di feridis indurmididis, di dolôrs lontans – Francesca Martinelli, che e conte, a traviers di videos, fotos e instalazions, il teme de mari tiere, intindude tant che gjeneradore di vite, ma ancje tant che contignidôr di muart, di dulà che a sflorissin, par esempli, lis Trê Graciis di «Ridicula Difformitas». Tes oparis di cheste serie, la artiste e indaghe sui cuarps ibrits, sui scherçs di nature, sul rapuart ancestrâl om-tiere, ancje dal pont di viste fisiologjic. Pal scat fotografic al è stât metût sù un vêr set dulà che lis trê figuris a son stadis pardabon implantadis te tiere.
La artiste e cumbine la fotografie cu la performance e l’assemblament scultori. E conte, par imagjinis, storiis umanis intensis che a àn lidrîs tes tradizions contadinis de sôs origjinis. E dopre la modalitât de instalazion li che i ogjets reâi a deventin testemonis cidins, tant che al sucêt te serie dai «Cuarps portadôrs di protesis», happening – che e je protagoniste la artiste – blocâts te fotografie, ma cjalts e cjariâts di necessitât di vite tai aparâts ogjetuâi: un mont altri, dulà che la sene teatrâl des menomazions plui dramatichis e ven cambiade positivementri intun «imni di gjonde al cuarp che al fevele», e dîs la stesse artiste. La diversitât no ven alienade. Ve, di fat, che la protesi, i avôts fats cun animâi impaiâts e pipinis amputadis a fasin scuasi di acessoris feminins alternatîfs. Il lavôr di Martinelli al è simpri sul ôr tra la bielece e la deformazion, la perfezion e la menomazion e al puarte dentri di monts ibrits dulà che nature, animâl e ogjet si unissin intune forme uniche, deventant materie vive, plene di vite. Un «imni di gjonde» ae mari tiere e ai siei scherçs no prevedibii dentri di un mont che al mude e al imbrutìs par savoltâ.
Martinelli e je tra lis protagonistis de mostre «La miôr zoventût. Ipotesi sul contemporani in regjon», te Galarie comunâl di art contemporanie di Monfalcon fin ai 10 di Zenâr dal 2010. La idee di fonde e je chê di presentâ il lavôr di 29 artiscj zovins, nassûts o che a vivin in Friûl-Vignesie Julie: une testemoneance concrete de art dal vuê, une panoramiche umane de creativitât regjonâl.
Erika Adami
____________________________________________
CE FÂ
Un progjet culturâl organic metût in pîts di Comun e Provincie di Gurize e de Fondazion casse dal sparagn: trê mostris (logadis tal palaç de Tor, tal Cjistiel e tai Museus provinciâi in borc Cjistiel a Gurize), incuintris, leturis, laboratoris didatics e manifestazions ator dal teme Gurize, futurisims di frontiere, dulà che la frontiere e je, di une bande, chê gjeografiche, di chê altre, chê culturâl, lant daûr ae linie di separazion, segnade dal futurisim, tra mûts cetant diferents di interpretâ la realtât. A son stadis screadis ae fin di Novembar lis mostris sul rapuart tra Filippo Tommaso Marinetti e la avanguardie juliane e l’omaç a Tullio Crali. Dai 19 di Dicembar si podarà visitâ ancje la esposizion dedicade al impat dal futurisim su la mode e su lis arts aplicadis. Informazions al numar 040.663499.
E.A.

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +