Anei di vecjos clauts di fier, gjavâts des breis di cjasis furlanis ladis jù tai boscs de pedemontane, e pleâts par poiâur parsore gotis di aur o pieris preziosis. Anei des flabis. Ma ancje anei che a san di mâr, tirâts fûr di claps mangjâts di organisims marins, e spilis in arint che a riprodusin, par fusion, lis fraturis di une silice cjatade suntun troi in montagne. A son fîs de nature e dal lavôr dal om i zoiei contemporanis di Stefano Zanini, oresin udinês, erêt dal innomenât laboratori Zoratti, il plui vecjo dal cjâf lûc furlan, nassût tai prins agns Cincuante dal Nûfcent.
Zanini al cree piçulis sculturis di meti intor. Tocs unics, fats a man. Daûr di ognidun e je une grande cognossince de tecniche e dai metai, sedi di chei preziôs tant che l’aur o l’arint, sedi di chei plui puars, tant che l’açâl e il plomp. La creativitât dal oresin si cumbine cu la abilitât tal meti dongje materiâi difarents, doprant tecnichis tradizionâls, ma cuntun lengaç gnûf, moderni, fûr di logjichis comerciâls, che al da forme a une idee dal autôr. A nassin cussì oparis di art, bielis di puartâ e di cjalâ pe lôr estetiche e pes emozions che a trasmetin. A fevelin dal percors uman dal so autôr, de sô sensibilitât, dal so mût di sintî la realtât e di trasferîle tes sôs creazions.
La scuvierte dai zoiei contemporanis e je resinte. Zanini al jentre te buteghe dal nono, Eliseo Zoratti, tal 1981. Al à dome 16 agns e mieç: vie pal dì al lavore, di gnot al studie musiche. «Gno nono al jere just, ma un grum sevêr – al ricuarde –. Nol perdonave un erôr. Sul lavôr bisugnave sei perfets». Une scuele di vite pal zovin garzon. «Il mistîr si robe cui voi, mi diseve il nono. Cul sotfont dal furlan, che e jere la lenghe uficiâl de buteghe, o ai imparât cemût che si ten in man un fier, cemût che si dan cierts colps, cemût che si fasin ciertis finiduris, ma ancje la dissipline, a vivi». Stefano al continue la tradizion de buteghe di famee: al propon, inzornât, il stîl classic, chel che «nol fâs plui nessun – al dîs –, parcè che al domande masse timp. Cui doprial vuê une ongjele? Cui incidial a man? Cui fasial un lavôr a trafôr di une cierte complessitât? Nissun». Ma, di cualchi an, si è viert a gnovis ideis, formis e materiâi. Mert de colaborazion cul amì Giovanni Sicuro, scultôr furlan che lu à iniziât ai zoiei contemporanis: «Il gno secont mestri», al dîs Stefano. «O ai scomençât a fâ cualchi prove in açâl inox, cjalant ce che al faseve Giovanni. Sul prin mi plasevin i ogjets di savôr mecanic, dûrs. Daspò o ai tacât a staronzâ chês formis e a doprâ metai preziôs, tant che l’aur». Po e je rivade la piere: une passion nassude di frutin, cuant che, cui gjenitôrs, al leve tal Gargan e al imitave i manufats in silice dal neolitic, che al viodeve di chês bandis, atrat, za in chê volte, dal manufat «te sô dignitât». Po dopo al è rivât il fier, chel inrusinît di vecjos clauts, doprât pal plasê di «trasformâ un ogjet, che nol è plui utilizât, in alc altri». Pai prossims lavôrs, l’oresin furlan al pense di doprâ arint e, pe prime volte, ciment, di segnâ cun improntis digjitâls di fruts e grancj. Une provocazion daûr de balfuerie scjadenade de propueste dal Guvier di cjapâlis sù ancje ai fruts rom, ma ancje un mût par dâ valôr aes mans, che a lassin segns, imprest creatîf dal om par ecelence.
«Mi plâs la idee di un ogjet impegnât,
tal sens che al trasmeti une idee.
Mi plâs che al sedi biel – al sclarìs Zanini –, che si presei la dificoltât tecniche par fâlu, duncje, la abilitât manuâl dal autôr, ma al è necessari che al disi alc, massime cumò che si pense pôc».
Erika Adami
____________________________
CE FÂ
Pieris coloradis che a zuin cu la aghe, animâi di fantasie tiessûts cun ramaçs e fîi di jerbe, gjeometriis di stecs che si incrosin disegnant figuris astratis. Art in nature chê che lis “Feminis tal bosc”, ven a stâi Luisa e Irene Cimenti, Vera Paoletti, Leda Nassimbeni, Maria Grazia Paderi, Sandra Palazzi, Franca Morandi e Luisa Piovesan, a presentin a Aplis di Davâr dilunc dal flum Degan. Informazions sul sît: www.donnenelbosco.it
Tal centenari de nassite, Pinçan al à dedicât une mostre al paisan Enrico Peressutti, protagonist de architeture taliane dal Nûfcent, ae sô vite e aes sôs oparis. E je vierte fin ai 28 di Setembar, la sabide e la domenie des 10 di matine a misdì e des 4 aes 7 sore sere. Informazions al numar 0432/950005.
Gnovis / A tornin a jessi in volum li “LETARIS AI FURLANS” di Pre Bepo Marchet
Redazion
Une biele gnove pe nestre int! A tornin a jessi in volum li “LETARIS AI FURLANS” di Pre Bepo Marchet Intune edizion curade e comentade di Davide Turello, a saran presentadis MIERCUS AI 3 DI AVRÎL aes 5 e mieze sot sere inte sale consiliâr dal Comun di Glemone No stei a mancjâ! Us spietìn! […] lei di plui +
Gnovis / Ae presentazions dal libri “Feminis furlanis fuartis”, cetant public! Graziis
Redazion
Te seste edizion de rasegne “Quando le Donne” curade da la Aministrazion Comunâl di Romans, cu la autore, Walter Tomada, diretôr de “La Patrie dal Friûl”. A Cormons ur daran acet i Amîs da Mont Quarine, cu la autore a son intervignûde Roberta Nunin, professoresse ordenarie di Dirit dal lavôr ae Universitât di Triest, e Carlotta Del Bianco, […] lei di plui +
Rassegne stampe / Articul dal Messaggero Veneto dai 15-3-2024 su la presentazion dal nestri libri “Feminis Furlanis Fuartis” di Erika Adami
RedazionL'EDITORIAL / Preâ par furlan al è onôr e no pecjât
Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +
Gnovis / Acuile sportive furlane
Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +
Cungjò / Bonsignor Duilio Corgnali al è tornât ae cjase dal pari
Redazion
Al è cun profont displasè che o vignìn a savê che bonsignor Duilio Corgnali al è tornât ae cjase dal pari. O pandin dut il corot de “Patrie dal Friûl” e la ricognossince pes bataiis che un passion, inteligjence e fuarce morâl al à combatût pe int furlane e pe dignitât de nestre lenghe come […] lei di plui +