CUINTRI DAL DECLASSAMENT. Solidarietât internazionâl a la lenghe furlane

Ai prins di Setembar ancje il Friûl al jere a Aoste pal Festival des peuples minoritaires dulà che la Agjenzie regjonâl pe lenghe furlane e à fat un apel cuintri dal declassament metût in vore dal Guvier Monti cuintri de lenghe furlane. E no son mancjadis testemoneancis in difese dal furlan «Si scugne tignî alte la vuardie e manifestâ dute la nestre solidarietât al Friûl che al à subît un biel pataf ae sô dignitât storiche e linguistiche di bande dal Guvier. O soi restât mâl par chel che si pues forsit considerâ un at di ignorance, ma sot sot o ai traviodût un plui gjenerâl disen di un Paîs che al intint scjafoiâ lis autonomiis e lis diferencis». Lu à dit l’onorevul Luciano Caveri, bielzà europarlamentâr e un dai paris de leç 482/99 che e à stabilît pe prime volte la esistence e la promozion des minorancis storichis di Italie, a proposit dal decret dal Guvier che al à ometût di considerâ il furlan une lenghe minoritarie dentri de manovre di contigniment de spese publiche tal setôr de istruzion.
Caveri, cumò conseîr regjonâl de Val di Aoste e membri dal Comitât des Regjons dal Consei di Europe, al è intervignût ae cunvigne inmaneade in ocasion dal “Festival des peuples minoritaires” di Aoste indulà che a àn partecipât i rapresentants di disevot minorancis di dute Europe e dal mont, proponint che tal document finâl che al vignarà sotscrit ae fin di bande des delegazions, al sedi fat riferiment in mût esplicit ae “cuistion furlane”.
Introdusût dal assessôr regjonâl ae Culture e Istruzion, Laurent Viérin, il dibatit si è insiorât des relazions dei rapresentants des trê comunitâts ospitis di onôr: il deputât dal Stât francofon de Louisiane, Stephen Ortega, il diretôr de associazion irlandese “Oireachtas na Gaeilgedell” Liam O’ Maoladha e il president de ARLeF Agjenzie regjonâl pe lenghe furlane, Lorenzo Zanon, delegât dal president de Regjon Renzo Tondo e dal assessôr ae Culture Elio De Anna.
Zanon al à fevelât cul cûr in man a dute la platee di Aoste par domandâ solidarietât. «Nô no vin daûr de nestris spalis un Stât amì dal pont di viste linguistic. O sês voaltris popui des minorancis di Italie e de Europe i nestri vêrs amîs. Ve che alore us domandìn di alçâ fuarte la vôs insiemit cun nô».
«La sperance – al à zontât Zanon – e je che si sedi tratât di un erôr recuperabil e se cussì nol sarà o sin pronts a puartâ sul plan internazionâl la bataie par difindi la nestre identitât di popul, sigûrs di jessi un piçul ma impuartant tassel in chel maraveôs mosaic che si clame Europe».
Une necessitât condividude di Caveri che al à indicât propit te rêt di solidarietât – lui che al è promotôr de costituzion de ‘macroregjon’ europeane des Alps – il strument par la salvâ lis autonomiis”. ■
Redazion