Cuatri furlans cun lirichis in marilenghe in finâl al premi di poesie Gozzano

Domenie ai 18 di Otubar a Terzo, in provincie di Alessandria, si fasarà la premiazion de edizion 2015 dal Concors di poesie e narative Guido Gozzano, un dai plui impuartants a nivel talian.
La manifestazion che e cjape il non dal innomenât poete turinês, vivût tra la ultime part dal Votcent e l’imprin dal secul XIX, e je rivade ae sô edizion numar vincjesîs.
Juste cualchi dì indaûr, i siei organizadôrs a àn dât fûr la liste dai autôrs finaliscj. Te sezion dedicade ai libris di poesie si cjatin ben cuatri firmis furlanis: Luigina Lorenzini cuntun libri inedit, Maurizio Mattiuzza cun “La Donna del Chiosco sul Po”, Laurin Zuan Nardin cun “La carretta sfavillante – La briscje sflandorose” e Jacum Vit cun “Trin Freit”.
Une gnove conferme dal valôr de scriture poetiche dai autôrs dal Friûl, sedi par furlan che cun altris lenghis. Jacum Vit, cul stes libri che al partecipe al Gozzano, chest an al à vinçût ex aequo il premi Pascoli – altri prestigjôs premi talian – te sezion “dialetto” (come che le clamin lôr, N.d.R.).
O viodarìn cemût che e larà a finîle, intant us proponìn une cerce di poesiis in lenghe furlane presintis tai trê libris, une par autôr. ❚
Luigina Lorenzini
(Libri inedit)
––
A propo∫et di diu, e di fâ malta
Senticji un moment, e šcolta: ce êsel reštât
da las seras e diši ogni sorta di rubas
da las cunfidenzas, dai dolz
fats cuei a cjasa di lui.
Vin cjecarât di credi, capîši, di via ducj la štessa anima
po sin išûts da la puarta:
a lui, siò fi nencja nol j cjecara
ìa no špieta nišun par mangjâ
nos no ši vidìn cua∫i pi.
Ce c’a conta a é noma la vita vera
il rešt a’ son cjacaras* ruštidas in t’una veranda
par torna a fa su ognun il sio mont
di fritulas pi cotas, o croštoi cu las bufulas pi grandas.
Una cjarta dal mont, dal alt
ai son i vuai dai gjats tal soreli.
* cjacaras, ma ancje crostui
Maurizio Mattiuzza
Di “La donna del chiosco sul Po”, La Vita Felice, 2015
––
Di bot il frêt
Di bot il frêt e finalmentri
chest spasimâ da la lune, il cricâ
resurît di un ramaç, no je vere
che d’unviar dut al polse cu la tiere
a ‘nd’è ancjemò storiis e stelis, bausiis
ditis par stâ ben, la maravee
ch’a strenç il dì su la marine
amôrs fats par lassâsi
facendis di rabie e di lûs
come a no crodi che si nas pierdûts.
Laurin Zuan Nardin
Da “La carretta sfavillante – La briscje sflandorose” , Gaspari, 2015
––
(cence titul)
Il poete,
tu sâs,
al è di bant il poete
nol puarte dongje nuie il poete
il poete
al va intal sore sere
delicât e lunc
al va intune maluserie
di trois in miezeombre
al va a dismovi i grîs
a fâi lûs a lis lusignis
al va
il poete
a ingrumâ il scûr
a disturbâ l’arint de lune
al va
a scoltâ
chê ligrie di cisilis
intal aiar fresc e gnûf
e al impie l’aur
dentri intai voi des stelis
Giacomo Vit
Da “Trin freit”, Circolo Menocchio, 2014
––
Coru blanc
A son straordenaris, i nustris sests.
No pì ciùs, a si piàrdin ta l’aria.
Muts, lizèirs, fofs.
Ànzui pessotons i sin doventàs,
e i nustris impres’c a duàrmin
drenti lis stàlis, a s’insumièin
dal lui sdrondenòn… ❚
Di lidrisebutui.wordpress.com/Redazion