Sfuei Mensîl Furlan Indipendent
Archivi de Patrie

CONTECURTE. Al mancje un Re

............

“Si steve miôr cuant che al jere vîf il vecjo” al dîs Gaspar tornant al so puest dopo vê cjaminât ator pe cjase.
“Sigûr” i rispuint il camêl, poiantsi tal setiç che i fruts a àn doprât par fâ il desert, “âstu di meti Bepino cun chei ca? Chel al jere un om in gjambe, al veve zirât il mont, a vore fintremai in Egjit e ancje a Parîs mi pâr”.
“Di fat a mi mi a cjolte là tune buteghe sot de tour Eiffel” e fâs la femine che e gucje contente.
“Tu tu sês francese tant che jo napoletan” al riduce il becjar netant la manarie, nol conte là che ti comprin, ma la persone che tu jeris, jo, tant par dîle, o sarès armen”.
“Chei ca invezit a son dome lofios” al fâs Gaspar cambiant discors “lasse stâ che no si inacuarzin che noaltris i corìn ator pal apartament vie pe gnot, ma vêso sintût di ce che a tabaiavin îr sere?”
“No, parcè, di ce àno fevelât?” al domande Melchior sveantsi dibot.
“Dal frutin, di Jesus. A crodin pardabon che lui e Marie a fossin bionts e cui voi celescj, si rindêso cont?”
“Bionts come me?” al riduce il marangon che al à la buteghe dongje des palmis “Ma se nô si jere scuasit ducj de Galilee, dai mo, ma ce vano a fâ a messe, a scjaldâ il banc?”
“Ce vûstu, a son fruts no? Si viôt che a dutrine, invezit di stâ atents, a matein cui Gormiti, al è normâl” ju scuse la sartore.
“Eh no biele la mê parigjine, nol è normâl par nuie e dut câs”, al salte sù Gaspar sustantsi un tic, “che la Madonute e jere bionde pardabon lu à dite Dree, il fi di Bepino che al à passe cuarante agns, migo i canais”.
“Ce âstu di bruntulâ cumò?” i fâs Melchior al camêl che nol tâs mai une.
“No bruntuli, o rumii. O rumii e o resoni”.
“E di ce?”
“Dal fat che e podeve lâ ancje piês. Pense se Dree al vendeve dut. O finivin sparniçâts di ogni bande dopo passe trente agns che o sin insiemit. Al sarà lofio, ma almancul nus ten adun e tal cjalt tant che une famee.”
“Che fûr al sedi frêt, chel no si discut, ma âstu di meti il vieli” i rispuint trancuil Gaspar. “Chel, a noaltris Re Magjos, nus mandave prin tal cjistiel di Erode e daspò nus tirave dongje de capane dì par dì. Puar Bepino al veve une culture, migo come so fi. Cjale ca ce presepi che a àn fat, dut un casin, al è il vincj di Dicembar e noaltris Magjos o sin bielzà rivâts ca di Jesus cu la marcjanzie, dai…”
“A proposit di regâi” e domande une piore dute curiose “ma no jeriso simpri in trê. I tre re dell’oriente?”
Dulà isal chel altri, chel dal aur?”
“Baldassâr” i rispuint Melchior cu la vôs rote “chest an nol ven, i àn cjatade la asme, puarin e no se sintive di viazâ. Da la Persie fin ca jù a son gnots e gnots cence durmî une lûs”.
“Dîs lis robis cemût che a stan Melchior” i fâs il camêl, mastiant une fuee. “Baldassâr al respirave mâl ancje ai timps di Bepino, ma al è simpri vignût istès. La veretât e je che Dree chest an lu à tornât a meti te scjate bruntulant. “Cheste storie dal Re neri tal presepi” al à dite a la sô femine “e je dute une invenzion politiche sâstu? I Re Magjos a jerin blancs come nô, prove domande ator”? ■
di MAURIZIO MATTIUZZA

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +