I 138 Comuns furlanofons a àn sielzût di riconfermâ il sindic di Voleson Darzin a cjâf dal ent
Il sindic di Voleson Darzin Markus Maurmair al è stât riconfermât a cjâf de Assemblee de Comunitât Linguistiche Furlane. A Udin, a Palaç Belgrât, i rapresentants dai 138 Comuns aderents a àn ancje dât fiducie une altre volte al diretîf che al è formât di Daniele Sergon (sindic di Caprive), Ornella Comuzzo (assessore di Tavagnà) e Alessandra Vanone (assessore di Tresesin). Uniche ecezion il vicepresident Alessandro Marangoni (sindic di Dartigne) che al è deventât president de Comunitât Montane dal Glemonàs: par chest al à lassât, e a sostituîlu al è stât sielzût Gianluca Casali, sindic di Martignà.
◆ Un ricognossiment de validitât de gjestion dal trieni 2019-2022, caraterizât de capacitât di cressite che chest consei al à savût mostrâ: tal 2015, cuant che al è nassût, al cjapave dentri 86 Comuns e cumò in 7 agns si è rivâts a 138. In assemblee, il president al à fat savê che a son ladis une vore indevant lis tratativis cul Comun di Pordenon, che al larès a completâ la triade dai cjâf lûcs cun Udin e Gurize, e al rindarès la Assemblee ancjemò plui rapresentative di dute la comunitât furlane.
◆ Ae sentade de Assemblee a son rivâts, in rapresentance de Regjon, ancje il president dal Consei Pier Mauro Zanin e l’assessôr Pierpaolo Roberti, e ducj i doi a àn sotlineât trop che a son stadis incisivis lis azions a tutele de lenghe furlane e dal so ûs inte publiche comunicazion (in particolâr di bande de Rai) e de publiche aministrazion puartadis indevant in sinergjie cu la Regjon, tant che al à dit il president ARLeF Eros Cisilino. Chest al à fat cressi in maniere impuartante i stanziaments pe programazion radio e tv dedicade al furlan inte convenzion pal servizi public radiotelevisîf. Par intant la Aclif e à sburtât a meti in vore il telegjornâl “Lis Gnovis” su Telefriuli, che al à vût bon acet dal public.
◆ Maurmair al à mostrât di volê lâ indevant cul confront cu lis realtâts di chês altris Regjons a statût speciâl là che aministrazion e lenghis a cjaminin a pâr a pâr, e ancje cu la opare di pression su lis istituzions scolastichis par fâ rispietâ e atuâ lis normis previodudis tes areis là che si cjate une minorance linguistiche (in chest câs il furlan): la leç e permet di sbassâ a 10 il numar minim di arlêfs che a coventin par formâ lis classis, numar che cence deroghe al è di 15. Cheste deroghe no ven nancje domandade parcè che i dirigjents scolastics no le cognossin, dulà che invezit e podarès permeti di tignî vierts ples intîrs che se no a saressin destinâts a sierâ.
◆ Te suaze des iniziativis in cantîr, al è impuartant marcâ la atenzion che il diretîf al risierve ai zovins, inmaneant un progjet che al cjaparà dentri i Conseis comunâi dai fruts, par stimolâ i aministradôrs di doman a cognossi di plui la lôr tiere, la lôr storie, la lôr lenghe. ❚
