COGNONS DAL FRIÛL

Midiant de storie dai cognons furlans, si fâs ancje la storie dal nestri Friûl. Chest mês us proponìn i 5 cognons plui frecuents a Pordenon cjalant l’elenc telefonic,  presentâts par ordin dal plui presint.
(gjavâts fûr di «I cognomi del Friuli» di Enos Costantini e Giovanni Fantini ed. La Bassa/LithoStampa. O ringraciìn i autôrs pe disponbilitât e pe colaborazion).
SANTAROSSA
In mancjance di conferme tai archivis si pues pensâ che chest cognon al vegni fûr di une Santa (non di persone) cui cjavei ros. Altris ipotesis a disin che la origjine e sarès une localitât: une capele o une glesie avodade a Santa Rosa (duncje la dople s e sarès un fal di trascrizion).
Cognon une vore frecuent ancje a Purcie e nol è râr a Brugnere, Vile di Flum, Fontanefrede, Prate, Daçan di Pordenon. 1588, 6 febb. Francesco di Santa Rossa q. Paolo di Paussis (Palse) servo di Antonio Rizzardi di Rorai gr.
BRUSADIN
Al è un adietîf che tant in venit che par furlan, al vûl dî brusadiç e, duncje, al podares jessi stât il sorenon di un scûr di piel. Presint ancje a San Quirin, Vile di Flum, Cordenons e Purcie. 1650, 24 febb. Valentino Brusadino di Pordenone- teste all’inquisizione.
BOMBEN
Al sta par bon e ben. Duncje un non di bon auguri. A Udin tal 1370 Perocij de Bonben e a Sacîl tal 1424 Nicolaum de Bonbene de Utino. In dì di vuê al è carateristic in plui che di Pordenon (1513 Mattio de Bonben) ancje di Çopule; si cjatilu ancje a Cordenons, Purcie, Manià, Vile di Flum, Lavorêt.
FURLAN
Cussì a vegnin clamâts i abitants da Patrie. Ma al podeve jessi ancje un non di persone: tai archivis o cjatìn Forlanus filius Febi de la Turre e Friulana de Turribus; tal 1342 Furlane filie olim ser Matie de Flagonia. Come che al è facil capî, al è un cognon plui frecuent fûr dal Friûl a dimostrazion dai moviments de nestre int tai secui cuant che i cognons a lavin formantsi. A Trent, tal 1378 Bonaventura dit Furlanus e tal 1477 zuan furlan de carnia. A Copertino (Lecce) tal 1575 Lupo Antonio Furlano.
Al è presint ancje a Cordenons, Prate, Purcie, Sacîl, Daçan di Pordenon.
GRIZZO
Di Grizzo, borc dal comun di Montreâl. O fasìn dut câs notâ che tal Tresinte Griç al podeve jessi un non di persone. A Glemone, tal 1368 un Pieri di mestri Griç. Si cjatilu ancje a Cordenons. ❚