CJARGNE VIVE. Liuterie Rossitti a Tumieç

“Cheste ativitât al à scomençade par scherç gno pari – al conte Gilberto Rossitti -. Al lave spes ator pai flums, pai boscs a cjoli sù lidrîs che, in laboratori, a cjapavin forme. Dopo il taramot, al à volût fâi cuintri a chel moment cun ligrie e musicalitât, e al à cjatât la calme naturâl e juste tra len e musiche tal violin. E cussì si è svicinât a di chest gnûf mont, e plan planin al è lât a “robâ” il mistîr. Al à cjatât tantis personis che lu àn compagnât in chest percors. Tra i tancj, al à cognossût ancje Morassi che, tal timp, al è diventât un dai liutârs plui impuartants a nivel mondiâl e che vuê al à une famose liutarie a Cremone. Gno pari al lave ancje a Udin a fâ cors, po dopo al à partecipât a tancj concors che i àn dât tantis sodisfazions.
Ma la passion pal len e nas inmò plui indaûr. La storie dai fradis Giuseppe, Elio e Giobatta Rossitti e scomence tal dopovuere. A Trave, intal lôr paîs di nassite, a àn metût in pîts un piçul laboratori indulà che sul imprin a restauravin mobii vecjos e po dopo a àn tacât ancje a fâju. La domande e je cressude, i spazis no bastavin plui e viers la fin dai agns ’60 a àn comprât un teren a Tumieç e a àn fat un gnûf laboratori. Gno pari, Giuseppe, dopo dal lavôr al coltivave cheste passion. Duncje sabidis, domeniis, vacancis al mâr a jerin dedicâts ae sô passion.
Vuê i fîs di Giobatta (Amerigo, Mauro e Bruno) a àn imparât il mistîr. Dopo o soi rivât jo. Za di piçul o jeri spes achì inte liutarie. Graciis a gno pari che al cognosseve il mestri Ottavio Scarseletti, o ai tacât a imparâ a sunâ il violin. Po dopo, o soi lât al conservatori. Intant che o studiavi, o frecuentavi l’ambient di Gurize e duncje o ai vût un stimul par continuâ cheste ativitât. Ancjemò vuê, o fasìn riparazions di violins servint cheste zone.
Par fâ un violin a coventin cetantis oris di lavôr, e dut a man. Par ce che al inten il len, gno pari al à fat une ricercje: achì in Cjargne il len di risonance si lu cjate sul Pura, a Dimpeç e tal Tarvisian. Ma il len miôr si lu cjate in val di Fiemme (Pradazzo) indulà che a contin che Stradivari al lave a polsâ e al sintive vignî jù lis taiis su pes lissis e lui, daûr dal sun, al valutave cuale che che e sarès stade la miôr par fâ i violins.
Violins dai nestris a son lâts in Americhe e in Gjapon; ciert al è che vuê chest lavôr tu lu fâs dome par une vocazion e di sigûr no par dî di vuadagnâ.
La fortune de nestre ativitât e je par vie che e je stade tramandade di gjenerazion in gjenerazion. Di pôc, o vin fat cualchi pas di invistiment tecnologjic però no vin disnaturade la nestre aziende: o vin une vore di machinaris di vecje concezion che ti permetin di vê un control su cierts gjenars di lavôrs e a son rispietôs dal len massiç (no son materiâi di cumò come il panel pressât). Alore achì, par ogni singul toc, al tocje ogni volte preparâ o modificâ la machine; il risultât finâl al è un prodot che al è unic, ben identificât.”
✒ Marta Vezzi