CJARGNE VIVE. For e Avoltri e Marie Luggau

Chest an a colin i 500 agns dal “miracul” di Luggau, piçul paisut da Carinzie. Si conte che tal 1513  a Helena, une fantaçute fie di contadins, indurmidide intal prât indulà che vuê si cjate il Santuari e il convent, la Madone dolorade i ordene di fâ sù une glesie in so onôr. E cussì, intun prin moment, a ven fate une capelute in len po, tal timp, il convent e une glesie in stîl gotic. Il santuari vuê al è la mete di tancj pelegrins che a vegnin no dome dai paîs austriacs ma ancje da la Italie.
I leams storics dal For e di Avoltri, ma ancje di altris paîs de Cjargne, cun Luggau, a àn lidrîs un grum in sot. Probabilmentri i prins incuintris tra chestis dôs comunitâts a scomencin in gracie dal passaç dai nestris cramârs che si fermavin par domandâ cualchi gracie o par ringraciâ la Madone di chês otignudis.
Tal libri dai miracui (Mirakelbuch, conservât tal archivi dal Santuari) ripuartâts te publicazion di Marina Di Ronco tal Numar Unic “in Guart” de Societât Filologjiche Furlane, si podin cjatâ notâts tancj miracui sucedûts a int cjargnele: “Ai 25 di Jugn dal 1637 al ven puartât dal pari di Sighiet a Luggau, un frut nassût muart che la dì dopo, vint dât segnâi di vite, al podè ricevi il batisim; tal 1698, il cramâr cjargnel Johann Baptista Vital (forsit di Tumieç) che al stave par neâ intes aghis glaçadis dal todesc al invoche la Dolorade di Luggau che lu salve; ai 13 di Otubar 1765 Lucia Romanin e ven vuaride de malatie mentâl”.
Al somee che il prin e vêr pelegrinaç al sedi stât fat tal 1600 par sodisfâ un vôt dai cjâfs des fameis de Val di Guart cuintri la peste. Tal 1800, la comunitât dal For e domande jutori ae Madone di Luggau, in ocasion di une peste bovine.
Dal 1959, il pelegrinaç si fâs ogni an la ultime sabide di Jugn. Al comence aes cuatri di buinore de sabide te glesie di Sant Laurinç cul cjant dal ‘Salve Regina’; tor misdì si rive a Luggau, indulà che il priôr todesc al ven incuintri ai pelegrins cui confenons. La domenie, dopo la messe solene, al scomence il viaç par tornâ indaûr.
Ogni an, e je tante la int che a cjape part al pelegrinaç. Cui va par fâ une cjaminade, cui par rinfuarçâ la fede, o par domandâ une gracie o ancje dome par curiositât… Di là di dut, e je int che si cjate par condividi il gust di stâ insiemi, di cjaminâ, di preâ, di cjantâ. A son doi dîs indulà che la corse cuotidiane cence polse e dispès spasimade si ferme, par tornâ come un timp a vivi e a gjoldi cun semplicitât il vêr spirt dal pelegrin.
✒ Marta Vezzi