CJARGNE VIVE. Agriturismo Al Borg in Aip di Cleulis

Voie di pâs, di trancuilitât, di stacâ la spine dal solit drandran di ogni dì? La rispueste e je l’agriturisim Al Borg, in localitât Aip di Cleulis di Paluce. L’agriturisim al è stât screât tal Mai dal 2011 e al è gjestît de famee Maieron. Marcellina Zanier e Simone Maieron a son i doi zovins che a si ocupin de part gastronomiche dal ambient: dopo vê studiât di cogos, a àn madurît intai agns di lavôr une buine esperience intal mont de ristorazion. La mari di Simone, invezit, si ocupe de fatorie sociâl. Tantis a son lis scuelis che i fasin visite: une ocasion par cognossi i animâi ma ancje par imparâ a lavorâ la lane cuete, par viodi dute la scjale de lavorazion de mîl e v.i.
Il puest al è un incjant, e cun di plui si puedin fâ une infinitât di cjaminadis a pît, cul cjaval, in biciclete, e se no si è stracs si pues fâ un salt tai lûcs de memorie, tant che il museu de grande vuere a Tamau, il monument ai soldâts muarts in vuere tal Ossari, i cjaminaments e lis trinceis tes monts come il Pâl Piçul e il Pâl Grant. Dongje de visite ai puescj tor venti, si pues ancje gjoldi dal tant innomenât e gjenuin mangjâ tipic cjargnel, e magari dâ un cuc ai lavôrs in lane cuete fats a man.
“Nol è par nuie sempliç tirâ indevant”, e conte Marcellina. “Prin di dut, vê un agriturisim al vûl dî vê di rispietâ une liste cence fin di disposizions, parametris e regulis. Par esempli, nô o puartìn i animâi a fâ fûr te becjarie di Zui, e par fâ chest o vin di tignî un regjistri di pueste par cjapâ note di cuant che l’animâl lu poìn intal furgon e cuant che lu tornìn a puartâ a cjase. Cussì, ancje pe robe che o metìn intal frigo: tocje simpri di segnâ dut par vê un inventari simpri inzornât de robe che o vin. No si discor po dopo des normis di sigurece e de burocrazie… Jo o pensi che a volaressin mancul cjartis e plui jutoris di bande dai ents comunâi e ancje regjonâi”.
La volontât no mancje, ma e covente ancje la int e alore no stin a dismenteâ che l’agriturisim al è viert ogni fin di setemane, e tai mês di Lui e di Avost al è viert ogni dì. ■
Marta Vezzi