CJARGNE. Riforme sanitarie regjonâl, si dislozial ancje in Cjargne?

Situazion atuâl. A proposit de propueste di riforme sanitarie regjonâl, la dotore Cristiana Gallizia di Tumieç e fâs chestis considerazions: “La sanitât Regjonâl e rapresente une realtât di ecelence intal panorame nazionâl, indulà che professionalitât e il virtuosisim economic nus vegnin invidiâts (la nestre Regjon e dopre plui dal 50% pe Sanitât e pe assistence). Si à di pensâ che o sin ancje tocjâts di gnovis emergjencis: di fat, l’aument des malatiis cronichis, l’aument de etât medie, il disasi sociâl, la denatalitât e l’abandon de mont a puartaran intal timp a une popolazion plui vecje, plui di bessole e problematiche.
Riforme. Chestis premessis par dî che une riforme sanitarie e je indispensabile se e je resonade, pensade, condividude, sperimentade e v.i. Personalmentri, dopo vê scambiât opinions cun diviers coleghis, o pensi che al sedi impuartant no dividi il teritori dal ospedâl: e va tignude la “prese in caricintegrade a persone”, come che a vuê al è inte Aziende n. 3, tra la fase de cure pai acûts (l’ospedâl) e la fase de cure pe convalessence o la cronicitât (RSA, miedi di base…).
Conseguencis. Pal ospedâl di Tumieç e sarès devastante la gjestion centralizade di bande de Aziende Universitarie di Udin: cheste e puartarès a scjafoiâ l’ospedâl piçul a pro di un altri a alte specializazion (gjavant intal timp lis risorsis professionâls e economichis).
Soluzions. Al è pussibil ridusi lis sîs aziendis a trê par otimizâ risorsis e percors clinics, ma e je di evitâ dal dut la division gjestionâl dai ospedâi di rêt dal rest de sanitât teritoriâl. Al sarà util tacâ a concentrâ ativitâts di alte specializazion, fondint doplons une vore onerôs e confederâ lis dôs Universitâts. Si puedin fâ economiis di scjale sul versant aministratîf, centralizant funzions (garis, contabilitâts pensionistichis…). Sul cjamp clinic si stan za sperimentant cun sucès convenzions interaziendâls par condividi ativitâts e competencis professionâls che a crein sparagn mantignint buine la ufierte sanitarie: in chest la ASS3 e pues jessi di esempli par virtuosisim economic e capacitât organizative. Intal timp al sarà util rivalutâ e potenziâ la medisine teritoriâl e il rûl dal miedi di base e dal infermîr di comunitât, par puartâ la salût dongje dal citadin cence che al vedi di spostâsi viers l’ospedâl o che al ledi cence motîf al pront socors”. ■
Marta Vezzi