CJARGNE. Gnûf bivac dal Lander

Il bivac si cjate a 1175 metris di altece, tal mieç dal percors naturalistic dai cjampanii dal Lander, che al partìs di Dimplan, troi CAI n. 408. «La vecje struture e jere stade fate tai agns 80 – al dîs Massimiliano Di Monte, president de Associazion Amîs da Mont – dopo 36 agns a jerin problemis di sigurece e o sin rivâts al pont che o le butavin jù, e la storie e finive li, o o metevin man a sistemâle. O vin scugnût prin di dut sanâ variis robis. La prime struture e jere stade fate sù suntun teren privât, dopo nô come associazion o vin scugnût paiâ condons, ma istès nol è bastât parcè che une part dal teren e jere inmò di proprietât dal mestri Ciglian e dai eredis. Par rivâ a sanâ, 7 agns fa, il Comun nus à dade une man e al è deventât paron dal bivac.»
Ma chest al è stât dome il prin pas! La associazion si è dade di fâ par bati casse a tantis puartis, sburtade soredut dal fat che ogni an e je simpri tante int che e va sù: cirche 800 -1000 personis!
Il Comun di Darte nol veve bêçs. Tal 2014, la associazion e à vude la pussibilitât di presentâ une domande al ‘fonts montagne 2014’ e tal 2015 e à vint il bant e ricevût de provincie 13.000 euros.
Ma no jerin avonde par puartâ indevant il progjet. Si è mot il Comun e al à presentade une domande di contribût ae Comunitât montane e cheste e à finanziade une altre fete di cirche 9.000 euros e «o vin decidût di lâ indevant – al continue Massimiliano – e intant o vin fate domande ae fondazion CRUP.
Par podê vê chest contribût, o vin scugnût fâ un contrat di comodât di ûs tra il comun e la associazion par 20 agns.
Tal Jugn dal 2016, o sin partîts: in trê mês o vin butât jù il vecjo, e tornât a fâlu sù gnûf. Pai lavôrs, o vin sielt aziendis cualificadis locâls. La struture e je stade fate in len de dite ‘Vivere nel legno’ di Sauris, la part dal basament e je stade fate de dite Giovanni e Mirco Peresson di Darte, i sieraments a son stâts fats di Giuseppe Selenati di Sudri, il cuviert a Çurçuvint di Gilan. Tancj di lôr a àn metût in cont dome il pûr cost dal materiâl.»
No si pues dismenteâ ancje il grant lavôr che al è stât fat di plui di 30 volontaris: ognidun al à metût dal so. Ancje midiant dal lôr contribût preziôs la associazion, sparagnant cualchi biel francut, e à podût sabide ai 5 di Novembar screâ il gnûf bivac. Al siere il President «il bivac di vuê al è une struture libare come che e jere prin. Lu vin un pôc ampliât e zirât, che al cjali ben la valade, e la struture e je di 5×5 metris – cirche 25 metris cuadrâts.
A flanc, ancje pal rispiet de fature che a àn fat i vecjos socis, o vin lassât il vieri basament dal prin bivac, fat cu lis pieris puartadis sù su pe schene di chescj vecjos.»
No us reste che lâ a fâ une biele cjaminade di cualchi ore tal bosc par rivâ a viodi cheste gnove struture tal mieç dal vert e de pâs! ❚
✒ Marta Vezzi