CJARGNE. Elio Grassi. Il spacecamin di Tierç di Tumieç

Elio Grassi tal 2004 al decît di molâ il so lavôr fis inte fabriche Fantoni par scomençâ une gnove ativitât: chê dal spacecamin: «O vevi simpri chest balin e sul teritori a jerin plui di 30 agns che al mancjave. Prime mi soi informât po dopo o soi lât in diviersis fieris specifichis. Ogni an, a fin di Fevrâr, e je une fiere dedicade dute al fûc e a dutis lis robis tecnologjichis. O soi lât a Rome a visitâ la Associazion Nazionâl Fumiscj Spacecamins – ANFUS – e o soi partît.»
Elio al à tacât planc planchin a fâsi cognossi intal teritori cjargnel e tal prin an al à scugnût ancje adatâsi a fâ altris lavoruts par staronzâ i conts. Tal secont an la ativitât e à tacât a lâ benon e cumò – al conte – «o fâs dute la Cjargne ma o rivi ancje a Glemone e tor Udin. Fasint il lavôr ben, o ai la garanzie che l’an dopo mi tornin a clamâ. O ai une vore di imprescj sofisticâts: telecjamaris, aspiradôrs potents, foradôrs… no plui scovets. Cussì si lavore plui in sigurece e cence sporcjâ lis cjasis.»
Cuant che Elio al à scomençade la sô ativitât, no jere inmò tant slargjade la mentalitât di tignî mont il cjamin. Cul passâ dai agns a son cambiadis lis robis: «la int che e compre cjase fasint il mutui e scuen ancje sigurâ la cjase e la assicurazion no rispuint se no tu âs fate la manutenzion regolâr dal cjamin. Jo o emet  une schede tecniche su la cane dal cjamin, un rapuartin di pulizie e la ricevude che e vâl pal an solâr. La pulizie e va fate daûr il consum. Un cjamin al va netât ogni 30-50 cuintâi di lens brusâts. Cuntune buine pulizie si à une buine combustion e un consum ridot di lens. A son cambiâts ancje spolerts, stuis e caminets… spes la cane dal cjamin e reste vecje e chest al puarte a formâsi incrostazions che a puedin cjapâ fûc.»
Il cost di un intervent al è sui 100 euros. Gjavant lis tassis, i reste ben pôc al spacecamin. Ma Elio al è content dal so lavôr e lu sta insegnant ancje a so fi: «In Cjargne il professionist al fâs la diference parcè che se si inzorne, se al sta al pas cui timps, al rive a vivi. La crisi, secont me, e tamese: al reste chel che al lavore ben. La int e varès di capî la impuartance di cheste profession: sot il profîl salutâr e de sigurece.»
Par cui che al à bisugne, al pues clamâ Elio Grassi (333 8899879 o mail spazzacamino@yahoo.it): il spacecamin al pas cui timps! ❚
✒ Marta Vezzi