Sfuei Mensîl Furlan Indipendent
Archivi de Patrie

CJAMINANT TE STORIE. I cjistiei di Atimis

............

Chest an o vin volût vierzi une gnove rubriche par presentâ dutis chês realtâts archeologjichis dal Friûl che, magari cussì no, a son mancul cognossudis ma no par chest mancul impuartantis. Par fâ chest o vin domandât la colaborazion de Societât Furlane di Archeologjie che dal 1989 si impegne cetant su dut il teritori par valorizâ e promovi il nestri patrimoni culturâl.

I cjistiei di Atimis

Il teritori di Atimis al fâs part di chê zone de pedemontane clamade Tiere dai Nûf Cjistiei che e presente impuartantis evidencis storichis e archeologjichis de Ete di Mieç, ven a stâi diviers cjistiei che si puedin viodi inmò in dì di vuê ancje se mâl o pôc conservâts. Achì a son presints ben trê complès, scomençant cun chel di Partistagn in localitât Borc Faris, il plui grant e componût di plui parts fatis sù in periodis diferents. La part superiôr, dulà che al è presint il turion, la capele nobiliâr, la cisterne e la zone residenziâl e je databil tor il XII-XIII secul; la part inferiôr, dulà che si cjate il palatium disvilupât su trê plans, e je sucessive (XIV-XV secul). In gracie dai elements cjatâts in chest edifici, in part sgjavât de Universitât di Udin, si è podût capî la destinazion dai spazis: il magazen tal semisoterani, il plan de rapresentance, chel residenziâl e in fin chel di servizi tal cjast.
Po dopo o cjatìn i cjistiei di Atimis Superiôr e Inferiôr, visitabii a pît cjapant un troi cun percors segnalât e ducj i doi di proprietât de famee Attems. Il prin, il plui vieri tra i doi fuartins, al ven datât tor il XII secul cuant che il proprietari, Bertoldus Episcopus de famee bavarese dai Moosburg, lu regale ae gnece Matilde e al so om Corrado; po tal 1170 il lôr fì Voldaric, marchês de Toscane, lu done ae glesie di Aquilee insiemi cun altris bens. Cheste struture, sgjavade e tornade a fâ sù tai agns ’70, e presente un turion pentagonâl e altris evidencis fatis sù in periodis diviers de sô esistence; dilunc dai sgjâfs dai ultins cuindis agns, che cumò a son promovûts de Societât Furlane di Archeologjie, a son vignûts in lûs cetancj reperts: segns di fogolârs, paviments in malte batude, curizûi di farie a testemoneâ una vite cuotidiane une vore plene e varie tra il XI e il XIII secul. Reperts impuartants recuperâts a son i rescj di past (grande cuantitât di vues di animâi soredut ovins e suins), recipients di ceramiche par fâ di mangjâ e conservâ, monedis, pendacui di golainis, tocs di armaduris, pontis di frece, dâts di vues, a testemoneâ la presince di sioris, di soldâts e di artigjans. Cualchi element al è za stât studiât e publicât dai esperts de Societât Furlane di Archeologjie, invezit il rest dai materiâi al è inmò in cors di studi.
Il secont cjistiel, chel Inferiôr, al è plui resint (tor la seconde metât dal XIII secul) ma in condizions plui precariis dal prin; a restin visibii dome dai rudars che si puedin condusi a une tor alte contornade di une cente di mûrs. Une campagne di survey e à puartât in lûs cualchi materiâl come tocs di ceramiche grese cun motîfs decoratîfs bas medievâi.
Il Museu Archeologjic Medievâl di Atimis si lu cjate te sede de vecje latarie e al conserve une part dai reperts vignûts in lûs in chescj agns in gracie dai sgjâfs fats intai cjistiei de pedemontane (www.museoattimis.it).
***
La societât furlane di archeologjie
La SFA e je une associazion di volontariât nassude a Udin tal 1989. I fins de Societât a son la tutele, la valorizazion e il recupar dal patrimoni storic-archeologjic nazionâl e regjonâl, te convinzion che i Bens storics-archeologjics a sedin di ducj e che ducj a vebin il dovê di partecipâ ae lôr conservazion.
La Societât e crôt che il volontariât, ben vuidât e sostignût des autoritâts, e sedi une buine arme, soredut se formât di personis motivadis e tantis voltis ancje specializadis.
E à sede te tor dal Cuatricent di Puarte Vilalte dulà che a cjatin puest une biblioteche amplie e un laboratori di restaur pai reperts che a vegnin dai sgjâfs. La Societât e je titolâr di cetantis publicazions sientifichis come «Quaderni friulani di archeologia» ogjet di scambi cun museus, Universitât e associazions culturâls.
Pes tantis ativitâts davueltis in chescj agns e pal just mût di fâ la SFA si è vuadagnade la titolaritât direte di concessions ministeriâls di sgjâf.
✒ Venusia Dominici e Giovanni Filippo Rosset
In colaborazion cu la Societât Furlane di Archeologjie, Par informazions: Societât Furlane di Archeologjie, Puarte Vilalte, vie Micesio 2, Udin. Tel. 0432 26560. www.archeofriuli.it

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +