Se e je une robe che, tai ultins agns, e à caraterizât la azion politiche dal centridiestre statâl e locâl, e je stade la incapacitât di cjapâ in man cun coraç argoments che aromai a son fondamentâi par vinci lis campagnis eletorâls e guviernâ. Nol è un misteri di fat che dut ce che al trate, par fâ un esempli, di lavôr e di ambient al sedi pratichementri esclusive de çampe, di chê culturâl e di chê politiche. Il teme de autonomie e dal autonomisim nol fâs ecezion: nissun partît di centri diestre (la Leghe Nord e va in ogni câs considerade fûr dai schemis tradizionâi) al è mai rivât a fevelâ di minorancis e di autonomie cence colâ tes banalitâts o tai prejudizis. Il dât al è statâl: lis regjons autonomis (Val di Aoste, Trentin, Friûl Vignesie Julie, Sardegne, Sicilie) a son dutis guviernadis di zontis di centri çampe e chei partîts che, par esempli, a rapresentin lis minorancis linguistichis (Union Valdotaine, Sudtiroler Volkspartei) a àn aromai stabilmentri cjatât tal front progressist l’unic riferiment par podê vê un confront cualificât.
Al è deventât un element struturâl: come che si sint la peraule “autonomie”, “specialitât”, “minorance linguistiche”, il centri diestre al scjampe. Al è stât il centri çampe regjonâl, cuant che al jere vuidât di Riccardo Illy, a passâ une leç su la promozion de lenghe furlane. Sigurementri une norme che e podeve jessi perfezionade, ma di sigûr miôr di chê che a varessin passât i conseîrs che, in chê volte, a jerin tal centri diestre. E al è stât simpri il centri çampe a difindi chê leç dai atacs dal front moderât che, cuant che si fevele di chês robis achì, tant moderât propit nol è… Ancje la narazion de campagne eletorâl des passadis regjonâls e je stade avonde iluminante: de specialitât de nestre regjon e à fevelât cun enfasi la candidade dal centri çampe, invezit il president di prime, di centri diestre, e la sô coalizion a àn finît par concentrâsi suntune lungje liste di robis fatis (e magari no tant sintudis de popolazion), cence frontâ cun coraç l’aspiet plui “golôs” dal nestri jessi part di un Paîs ingredeât come la Italie.
Parcè che al sucêt cussì, al è un misteri che no si risolf cun facilitât. A son resons storichis e altris politichis: la gruesse presince di elements che a fasin riferiment ae diestre sociâl e nazionaliste, une idee di Stât che, fûr di ogni logjiche liberâl, al è eficient dome cuant che al è fuart e inlidrisât, un malintindût sens di internazionalitât che nus fâs crodi che al sedi miôr jentrâ in Europe omologâts a altris 60 milions di talians pluitost che cu la nestre reâl identitât. E pûr, autonomie e ricognossiment des minorancis a varessin di jessi un patrimoni scuasi gjenetic di un moviment che si definìs liberâl e popolâr. O rivi a dî di plui: la plui alte imagjin di un centri diestre moderni e varès di viodisi propit te esaltazion e te atenzion aes comunitâts che si auto organizin e che a definissin lis lôr prioritâts culturâls e educativis. Invezit, denant di un numar altissim di fameis che a sielzin l’insegnament dal furlan a scuele, il centri diestre regjonâl si ustine a no capî e a no cjapâsi a cûr chê che e je une vere bataie di libertât. E al finìs par preferî la sielte stataliste dal insegnament, che e va te direzion contrarie di chê liberâl, chê de sielte individuâl.
Cussì, ancje sul argoment plui “istituzionâl”: invezit di ricognossi e valorizâ la autonomie e la responsabilitât di comunitâts umanis che si ricognossin intune lenghe e intune storie comun, il centri diestre al spose ad implen un neu centralisim incomprensibil, cun epicentri Rome pal nivel statâl e Triest par chel locâl. Cui che al podarès slontanâsi di cheste omologazion e je la Leghe Nord che, dut câs, in chescj agns e à lavorât plui pe costruzion di un partît bon di scambiâ Milan a Rome, pluitost che a une reâl agregazion di fuarcis autonomistis. Vuê la vere domande e jê cemût superâ chescj fats. E chei che, come me, a son convints sostignidôrs dal centri diestre e tal stes timp a son sigûrs che chest al puedi convivi cuntune esperience autonomiste, a àn di cjatâ i struments par fâ un struc, che al semee dificil – ma dome al semee. La classe dirigjente dai partîts principâi si è formade soredut intun ambient un grum caraterizâts e influençâts dal dât statâl. Ancje i sistemis eletorâi di chê che si considere la Seconde Republiche a àn judât a slontanâ ancjemò di plui i politics dai lôr teritoris di riferiment. Il risultât al è che, in chestis cundizions, si è rot ogni leam cu lis tieris di origjin, l’autonomisim e ogni resonament sul so rinfuarciment al devente un ornament plui che une cjarte di zuiâ. La sperance, la uniche pussibile, e je che il grant savoltament che lis elezions a stan a man a man provocant (prime il “boom” di Grillo, daspò chel di Renzi) al puedi puartâ a une roture gjenerazionâl in grât di puartâ in piste oms e feminis bogns di rapresentâ il teritori e la sô specialitât. Che e je une specialitât linguistiche e culturâl, ancjemò prime che economiche e istituzionâl. ❚
Simone Bressan
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
La tiere e la grepie / 2022: An internazionâl de pescje artesanâl e de acuiculture
Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +
Austrie / La Universitât Popolâr che si indrece a dutis lis fassis di etât
Barbara Cinausero
Si Beate Gfrerer, 54 agns, che bielzà di 25 e je a cjâf de Volkshochschule (Universitât Popolâr) carinziane, e je stade nomenade “Carinziane de Zornade”. O soi stade par cinc agns in Carinzie e propit in cheste scuele o ai insegnât e o ’nt cognòs ben la organizazion. Juste in chel periodi si insaldave il […] lei di plui +