Ma no mancjin formis di estremisim spagnolist benedet dai Ciutadanos
Il gnûf confront tra Madrid e Barcelone, il ritîr dai ordins internazionâi di arest pai politics catalans esiliâts, lis mobilitazions dai aministradôrs locâls a pro de autodeterminazion e pe liberazion dai presonîrs politics, la crosade cuintri dai simbui indipendentiscj e il prin inovâl dai atentâts jihadiscj fats a Barcelone e a Cambrils ai 17 e ai 18 di Avost dal 2017. A son almancul cinc i motîfs che nus sburtin a pontâ ancjemò une volte la nestre atenzion in direzion de Catalogne.
Il prin al tocje i rapuarts tra il gnûf guvier catalan e la Moncloa, là che di passe doi mês nol è plui Mariano Rajoy e che al so puest si cjate il socialist Pedro Sanchez. Ai 9 di Lui stâts il premier spagnûl e il president de Generalitat, Quim Torra, si àn dâts dongje intun incuintri uficiâl. La riunion e je stade «lungje, cordiâl, corete e sclete», cemût che a àn marcât tes lôr declarazions seguitivis i siei doi protagoniscj. Lis posizions a son lontanis, ma almancul la baridure prejudiziâl tirade sù di Madrid in passe dîs agns e je un tic plui basse e salacor al è stât viert un barconut. Se di une bande Torra al à batût sul dirit ae autodeterminazion e Sanchez al à tornât a dineâ che un principi di chê fate al sedi proviodût de Costituzion in vore, di chê altre i doi interlocutôrs si àn cjatâts in convigne suntune schirie di cantins, des politichis sociâls ae sanitât, e il premier spagnûl al à cjapât sù l’impegn di tornâ a meti in vore la Comission bilaterâl tra Stât e Generalitat, che e jere ferme dal 2011.
Torra, inte conference stampe fate a Madrid juste dopo de riunion, al à riferît di no vê frontât cul premier lis dôs cuistions dai presonîrs politics, ma al à marcât il fat che chê de justizie e reste une cuistion di fonde e che su chest cantin si viôt la distance jenfri Europe e Stât spagnûl. Lu conferme la decision dal tribunâl superiôr dal Schleswig-Holstein di dâ acet ae domande di estradizion pal ex president catalan Carles Puigdemont dome pe acuse di malversazion e no par chê di ribelion. Cussì, ai 19 di Lui, il judiç Pablo Llarena al à scugnût rinunciâ ae estradizion di Puigdemont e al à ritirât i ordins internazionâi di arest cuintri di lui e di chei altris politics catalans esiliâts in Belgjiche, Scozie e Svuizare. Cumò ducj cuancj a àn libertât di moviment fûr dal Ream di Spagne, ma no puedin tornâ in Catalogne par vie che cuintri di lôr al reste ancjemò in pîts il mandât di arest dentri dal teritori statâl.
Intant a son passe 300 i dîs di detenzion dai ativiscj Jordi Sanchez e Jordi Cuixart e si svicine a chê cifre ancje la presince in preson dal ex vicepresident de Generalitat, Oriol Junqueras. Par chel, a van dilunc lis iniziativis a pro de liberazion di ducj i presonîrs politics metudis adun de bande di associazions e aministrazions locâls. Magari cussì no, chestis mobilitazions pacifichis a cjatin su la lôr strade simpri plui dispès grups estremiscj che, cu la benedizion politiche dai unioniscj dal partît dai Ciutadanos, ur fasin cuintri cun azions violentis di stamp fassist, che a àn tant che obietîf lis bandieris “estelades”, i flocs zâi e ancje lis personis che a mostrin chei simbui.
Al è ancje timp di memoreâ il prin inovâl dai atentâts dai 17 e 18 di Avost. Cundut de oposizion dal guvier catalan, te manifestazion uficiâl a Barcelone al jere ancje il re Felipe VI. La sô presince e je stade poiade a fuart dal guvier di Madrid e fintremai dai “republicans” di Podemos. In cont des lôr posizions a pro, plui di cualchidun al à marcât, cun bocje di ridi, che finît il socialisim “reâl” cumò al reste dome chel “monarchic”.
La partecipazion dal re e je stade saludade cun trê grancj strissons che lu definivin “persone no gradide tai Paîs Catalans” e a ricuardavin i afârs de sô famee cul re saudite. Tancj cartei di contestazion a son stâts recuisîts dai polizais e a son stâts ancje un pôcs di lôr che a àn tirât fûr bandieris spagnolis, a àn contestât lis contestazions e a àn tentât une agression a un trop di gjornaliscj catalans. Il dut al conferme la esistence di une cierte tension e di ce che al salte fûr dal scandai fat dal sît di informazion CTXT cualchi setemane indaûr: il nivel di gradiment de monarchie e dai Borbons de bande de popolazion al è minoritari e fintremai scjars tai Paîs Catalans, tal Paîs Basc e in Galizie, intant che al è maioritari ta chês altris regjons dal Stât spagnûl. ❚
Marco Stolfo
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +