Sfuei Mensîl Furlan Indipendent
Archivi de Patrie

SLOVENIE. Ambient, culture, infrastruturis. Strategjie comune cul cluster transfrontalîr

............

A son vincjecinc i comuns de fasse confinarie di mont tra la ex provincie di Udin e la Alte Val dal Lusinç in Slovenie, che si son dâts adun intun cluster transfrontalîr. A cuvierzin une aree che e passe i doi mil chilometris cuadrâts e a contin ducj insiemi plui o mancul 57.500 abitants. Il cluster al è nassût par conciertâ in mût plui zovevul il disvilup socioeconomic dal teritori e par contrastâ il dispopolament di chestis zonis. A àn aderît ae iniziative i municipis di Dartigne, Atimis, Scluse, Dogne, Drencje, Faedis, Grimac, Lusevare, Mueç, Nimis, Prepot, Pulfar, Resie, S. Lenart, S. Pieri dai sclavons, Savogne, Stregne, Taipane, Tarcint e Torean de bande taliane, e Pleç, Tulmin, Cjaurêt, Kanal ob Soči di chê slovene.
Il progjet al è nassût dopo dal tradizionâl incuintri di principi an fra i sindics des dôs bandis dal confin, che al è stât chest an a Cjaurêt ai 20 di Zenâr. Dopo di une serie di riunions informâls che si son tignudis intai mês dopo, in Lui si è rivâts infin ae firme dal protocol di intese: ai 6 di Lui il document al è stât firmât dai sindics talians, ai 17 dal stes mês e je rivade la firme ancje dai prins citadins slovens. Il prossim incuintri, li che a saran presints esponents de Regjon Friûl-Vignesie Julie e de Slovenie, al varès di jessi il prin di Setembar. Plui indenant invezit, il cluster al podarès jessi viert ancje a sogjets di nature privade.
Il cûr dal cluster al sarà costituît dal Plan di azion transfrontalîr che, dentri de strategjie locâl dal teritori, al tradusarà i obietîfs in azions concretis su la base di temis specifics. Cualchidun di chei – i prioritaris – al è stât delineât za inte intese: la valorizazion des risorsis ambientâls, la energjie (disfrutant, par esempli, lis risorsis forestâls dal teritori e, in chest mût, produsint sparagns che a podaran jessi tornâts a invistî in altris setôrs), il turisim e lis risorsis comunis di culture, lenghe e tradizions, lis infrastruturis (mobilitât sostignibile, viabilitât e acessibilitât), la poie ae economie locâl, ae imprese e ae inovazion, la coesion sociâl e la poie ae popolazion residente e, infin, la sigurece dal teritori.
Il protocol di intese al fisse ancje i orghins che al sarà componût il cluster: il Grup coletîf di gjestion, formât di ducj i partecipants, e il Grup di Coordenament tecnic sientific formât dai rispetîfs cjâfs di grup – Alan Cecutti, sindic di Taipane, e Robert Kavčič, prin citadin di Cjaurêt (a Novembar però in Slovenie a saran lis elezions aministrativis) – che a podaran invidâ a partecipâ altris sogjets esperts par setôrs particolârs e specifics. ❚
Tjaša Gruden

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +