CATALOGNE. Indipendence catalane: ise dongje o ise lontane?

Ai 11 di Setembar la Catalogne e celebre la fieste nazionâl, in ricuart di une fuarte repression che e je costade la vite a une vore di cataliscj e la rese di Barcelone tal 1714 al esercit franc castilian di Filip V. La manifestazion di chest an e à vût une vore di adesion e la clime politiche in Catalogne e fevele simpri plui di Indipendence. Ma la realtât e vâ frontade cun atenzion. Ta cheste tabele si à cirût di fâ un struc de situazion che si presente plui complicade di ce che a contin.
DONGJE
Mai tant consens
La manifestazion pe indipendence che si fâs ogni an ai 11 di no à mai vude tante int (tra i 2 milions, pai organizadôrs, e i 600 mil, pal guvier di Madrid); i scandais a disin che un 50% dai catalans al volarès la indipendente.
Une volontât che si viôt
Mai cussì tantis bandieris catalanis (in particolâr chês cu la stele, vâl a dî chês indipendentistis) picjadis tai barcons des cjasis.
In politiche i catalaniscj a son fuarts
Tal parlament catalan i partîts catalaniscj, che a peraulis a vuelin o a cjapin in considerazion la indipendence, a cuvierzin la maiorance assolude e Convergència i Unió, partît catalanist di centridiestre, e guvierne la regjon.
Grande organizazion e grande civiltât
Ancjemò une volte i catalans a mostrin di jessi mestris tal movi la societât interie e tal fâlu te maniere plui civîl e pacifiche: cun fuarce ma cence violence.
LONTAN
O ise dome proteste?
In realtât i “indipendentiscj” convints a son tra il 20% e il 30%. Chei altris a son dome rabiâts cuintri dai centris di podê e no si rindin cont che il guvier e la finance catalane a àn lis stessis colpis di chei di Spagne: speculazion imobiliâr che e à distrut la economie, disocupazion al 25%, a restaressin ancje intune Catalogne indipendente.
Ma no pardut
Fasint un zîr pai borcs plui rics di Barcelone (zone di Pedralbes) di bandieris a ‘nd jere propit pocjis: cui che al à plui bêçs al sburte di mancul par une Catalogne indipendente.
Ma i politics a mostrin di no crodi te indipendence
I grues partîts catalaniscj storics, di çampe e di diestre, no crodin te indipendence, le doprin dome tant che pretese pustice par difindi la autonomie o par otignî alc di plui di Madrid. Il stes president de Generalitat de Catalunya, Artur Mas, cun scusis avonde pietosis nol à partecipât ae manifestazion, le à laudade e al à dite che al jere presint in spirt, ma tal so discors uficiâl al è stât ben atent di no dî nancje la peraule “indipendence”.
E dopo?
Al jere za sucedût tal 2010 par difindi il statût di autonomie des censuris imponudis di Madrid, ma dopo nol veve zovât a nuie. Il podê al è lontan de place: la indipendence di une nazion e à bisugne dal supuart dal popul, ma ancje de creazion di un gnûf podê politic e economic. In Catalogne il podê politic e chel economic a restin cjapâts sot braç cun chei di Madrid. ■
Sandri Carrozzo