Semafar ros al proliferâ di struturis intermodâls in regjon: «A coventin volums alts e al bisugne concentrâ»
«La industrie manifaturiere furlane e ponte sul interpuart di Çarvignan, che al pues deventâ l’hub regjonâl de intermodalitât par anticipâ lis politichis de Union Europeane che a sburtin bande il traspuart su sine». Massimo Masotti, component dal cda de Masotti srl di Felet e cjâf grup dal setôr traspuarts e logjistiche in Confindustrie Udin, al è otimist su lis prospetivis dal coridôr Adriatic-Baltic.
«E je une oportunitât cetant impuartante pal Friûl che tra l’altri e je za une realtât, no dome un progjet. Al è un pachet di servizis feroviaris che a puedin lâ a vantaç di dutis lis impresis di manifaturis furlanis. A regjim, e sarà une serie di colegaments cu la rêt feroviarie centrieuropeane cun consegnis regolârs e garantidis».
Ce isal di fâ prin di dut?
«Sul teritori e je za une serie di struturis intermodâls tant che Çarvignan, Gurize, Pordenon e Fernetti. Prioritari al è cressi lis fermadis tecnichis a Çarvignan dai trens direts di Triest bande il Nord Europe, in mût di svicinâ il pont di cjame ai lûcs di produzion in Friûl. Chest al podarès fâ di sburt pal aument dai volums e des frecuencis di marcjanziis in partence dal Friûl, cul obietîf di rivâ a componi trens diretementri di Çarvignan. La mê stesse imprese e dopre servizis feroviaris, ma no vin volums suficients».
Ce mancjal par fâ jevâ chescj trafics?
«E mancje soredut une frecuence cuotidiane, che e dipent dai volums. Dal pont di viste infrastruturâl, a Çarvignan a son pronts. Dal pont di viste dai coscj, no viôt ostacui par che Çarvignan al deventi l’hub intermodâl par dut il Friûl. Impuartant al sarà un completament svelt dal passant che al unirà il casel autostradâl di Palme al interpuart (cumò si ferme aes puartis di ‘Sevean di Bagnarie, ndr) par evitâ problematichis di timps di consegne in Istât, cuant che la statâl par Grau e pues jessi cetant traficade. No viôt resons par un proliferâ di interpuarts in regjon».
La presince dal coridôr Adriatic-Baltic puedie deventâ un element di atrat pes zonis industriâls furlanis che i son dislocadis dongje (Ziu, Aussa Corno, Cipaf e Carnia industrial Park)?
«La Union Europeane e vûl rivâ al trasferiment modâl dal traspuart des marcjanziis de gome ae ferovie in timps no luncs. Il fat di disponi di un coridôr feroviari impuartant devant di cjase tant che la Pontebane che e à pussibilitâts di disvilup impuartantis, e je une grande oportunitât pes impresis insediadis in Friûl, se no inte imediatece, almancul intal medi periodi».
(r.p.)