Sfuei Mensîl Furlan Indipendent
Archivi de Patrie

Ceccarelli: «Metìn su sine i vetôrs dal Est che a stropin la A4»

............

Il storic imprenditôr furlan dal autotraspuart al bole il tren par destinazions sot dai 500 chilometris

Bernardino Ceccarelli, 73 agns, al cognòs vite, muart e miracui dal setôr furlan dai traspuarts. E al sarès limitatîf definîlu une “memorie storiche”, parcè che il so voli imprenditoriâl al è indreçât in maniere fisse al futûr, element che al à permetût al Ceccarelli Grup di disvilupâsi in maniere costante, evitant lis scossadis fuartis che a àn colpît il setôr dal autotraspuart intai ultins decenis e fasint dal cambiament e de atenzion al client une jeve pe cressite aziendâl. Ma no dome: tant che vicepresident de Api (Associazion industriis piçulis e mediis) di Udin, al pues fâ di puartevôs a une part impuartante dal setôr furlan di manifaturis che al movimente marcjanziis.

Cemût valutial lis prospetivis di un disvilup de logjistiche in Friûl leade al coridôr Adriatic-Baltic? Cjacaris o une ocasion concrete indulà invistî?

«Scomencìn des impresis di traspuart. La incressite dai trafics tal puart di Triest al pues vê une ricjadude su lis impresis furlanis dal setôr dome se si atirin trafics che a rivin su nâf in containers che lis lôr cjamis a vegnin distribuidis inte plateforme di logjistiche integrade che si è daûr a fâ intal puart julian. Se chest al sucedarà, ae logjistiche furlane i rivaran beneficis. Fin cuant che a rivaran containers a caric complet che a Triest a son discjamâts su camions o trens par rivâ a un sôl destinatari cussì cemût che a son, l’autotraspuart furlan nol varà mai nissun benefici. Si à di atrai tipologjiis merceologjichis che a àn bisugne di jessi distribuidis su plui destinazions».

Par ce che al tocje invezit il rûl che l’interpuart di Çarvignan al pues zuiâ a pro de competitivitât des impresis di manifaturis furlanis?

«Cul cjapâ fuarce dal just in time, lis modalitâts di spedizion a son cambiadis une vore. Vuê aromai nissune imprese e à un grant magazen. O sin nô traspuartadôrs a fâ di magazen viazant, sedi pe Italie che pal forest. In chest contest, al coventarès che a fossin impresis interessadis a mandâ gruessis cuantitâts bande une sole destinazion e cence une urgjence particolâr. I turcs, par esempli, a doprin Triest parcè che i lôr carics a àn chestis carateristichis che ur dan tante mancul presse inte consegne. Se di no, al è une vore improbabil che si puedi cjamâ cualchi camion sui trens. In Friûl, la domande no je di carics complets ma di groupage di marcjanziis. Dispès, suntun camion a son carics cun 5-6 destinazions diviersis. E se o cjapìn par esempli la Gjermanie, i clients a pretindin che la marcjanzie in partence vuê e rivi a destinazion doman o al massim passantdoman. In France ancjemò piês. Se fin vuê i camions furlans no àn viazât su tren al è parcè che nol conven. Se invezit dai camions su tren o pensìn a trafics di containers e cassis mobilis, si fevele di cuantitâts ancjemò plui grandis. Si sa che dentri dal rai di 500-600 chilometris il tren nol sarà mai e mai altri competitîf. Duncje metìnle vie. Dibant pierdi timp. O vin fat esperiments, la Regjon e à spindût bêçs par incentivâ i trens che dopo a partivin vueits o cuasi. Se no si metin ator de taule ducj i spedizionîrs par verificâ trops carics complets che a van bande la Gjermanie, i risultâts dopo a son chescj. Intai ultins 5 agns mai un assessôr regjonâl al è vignût ae Associazion piçulis e mediis industriis (Api) par domandâ di ce che a àn dibisugne lis industriis associadis».
Tant che Api, no sêso stâts cjapâts dentri intal studi de Aiom (Associazion operadôrs maritims) di Triest in at propit par fâ chest monitorament?

«No sin stâts clamâts mai de Aiom. Su domandade de presidente Serracchiani o vin partecipât invezit a un lavôr itinerant articolât, promovût de Cjamare di cumierç, visitant ducj i interpuarts e i autopuarts de regjon par viodi cemût atirâ trafics. O vin corût par 6-7 mês pal Friûl, ma dut al è muart là. E je masse dispersion. A jerin za Çarvignan e Gurize, cumò ancje Pordenon al à volût disvilupâ il so autopuart. Intune regjon piçule tant che che la nestre a son masse cjampanii, no je une programazion».

Çarvignan puedial funzionâ tant che unic pont di acès intermodâl in regjon?

«Ciert, al vûl un sôl interpuart. Il Venit, che al è tant plui grant di nô, al à dome doi grancj interpuarts a Verone e Padue, no 5-6 tant che ca. Si à di concentrâ par vê lis cuantitâts suficientis che a garantissin une gjestion eficiente, no sperâ o preâ Diu che dut al vadi ben».

Duncje la intermodalitât e podarès valê dome pes distancis lungjis?

«Esat. Al bisugnarès meti ator di une taule i vetôrs dal Est che a viazin su gome, e che intal ultin deceni a àn triplicât lis lôr flotis cui aiûts publics, cul fin di meti su sine in Friûl i semirimorchis direts in France, Spagne e Portugal. Che si pensi che sul trat furlan de A4 e je une targhe taliane a front di 15 forestis. Se di no Çarvignan nol jeve, nancje cjantant lis litaniis trê voltis in dì».

Duncje lui crodial di plui inte diretorie Est Ovest che in chê Nord Sud dal coridôr Adriatic-Baltic?
«No. Nô o vin crodût simpri al Adriatic-Baltic, ma la cuistion culminative e reste simpri chê di rivâ a un volum adeguât di trafic e vuê chest, bande la Gjermanie, al è dificil pai motîfs che o ai sclarît».

Cemût valutaiso l’operât de autoritât portuâl vuidade di Zeno D’Agostino?

«Cu la gnove aministrazion tal puart di Triest lis robis a son cambiadis in miôr. Al è un clime diviers, si viôt une grande voie di fâ ben. O vin vût incuintris tant positîfs cul diretôr de Autoritât portuâl Sommariva. Chescj contats a varessin di jessi però tant plui fis, almancul ogni 6 mês, par viodi cemût che a son daûr a lâ lis robis e par scoltâ i operadôrs che a àn dal sigûr cualchi iniziative di sugjerî».

(r.p.)

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +