✽✽ L’an si vierç cu lis provinciis che a tornin in maniere definitive. Nissun sfuarç inteletîf de bande de zonte Fedriga par lâ a definî un rûl gnûf par chescj ents di aree largje. Ae megalomanie des UTI de Serracchiani che e voleve jessi la prime a abolîlis par fâsi biele denant de dirigjence nazionâl dal PD, e je vignude daûr la formulazion ridicule e inutile dai ents di decentrament regjonâi, cun chê sigle EDR che no passarà sigûr ae storie e che nissun si è inacuart de lôr esistence.
✽✽ Lis provinciis a tornaran cence savê cualis che a saran lis lôr funzions, se a saran eletivis, par passi l’apetit di tancj peones de politiche trombonâts in altris competizions. Lis critichis de oposizion a tocjin soredut il rûl dai Comuns e lis dificoltâts là che si cjatin vuê, po e je la cuistion dal personâl che lis provinciis a varan di doprâ par frontâ i gnûfs compits. Si trate ancje in chest câs di mancjance di prospetivis. I partîts talians, inte lôr logjiche centraliste calade inte vision regjonâl, no si preocupin de situazion che il Friûl al è daûr a vivi cul drame de gnove emigrazion che e je daûr a colpî la nestre zoventût, de denatalitât e dal dispopolament de Alte e des Valadis dal Nadison. E o scrîf dome Friûl e no Regjon F-VJ, parcè che in cualsisedi mût che a vignaran istituzionalizadis lis gnovis entitâts, la capitâl regjonâl no sintarà cambiaments: Triest e restarà capitâl regjonâl e ancje provinciâl, e e podarà fintremai sielzi di jessi ancje Citât Metropolitane.
✽✽ Jo o crôt che cui che vuê si proclame autonomist nol puedi no calcolâ che ogni pussibilitât di disvilup, ma a chest pont o disarès di esistence stesse dal Friûl, e vedi di passâ par une posizion ferme cuintri di chê unitât regjonâl pustice che cualchidun al calcole un mantra e che, dì par dì, e je daûr a dimostrâsi un boomerang.
✽✽ Ancje nô o varessin di doprâ l’imprest aborigjen, fasint in maniere che lis provinciis a sedin une jeve par rilançâ la idee di un Friûl che al va de Livence al Timau, che al passe la logjiche di UD, GO e PN viodudis no plui tant che targhis automobilistichis, ma tant che tieris che, ancje se inte lôr diversitât, a tornin a afermâ la volontât di frontâ insiemi lis sfidis de modernitât in non di une sole identitât storiche e culturâl. Zontìn ancje chê politiche: cambiìn lis cjartis in man di une Regjon mai nassude. ❚
