E je une vere imprese Di Mont, di non e di fat, birifici artesanâl che al è stât screât 7 mês indaûr in vie Nazionâl a Cedarcjis di Darte. “La idee e je nassude inmò un an fa par câs – al dîs Marco Maiero, president e responsabil aministratîf – nô socis si cognossìn di tancj agns e une sere si sin cjatâts intun bar pal aperitîf. Jo o vevi di lâ in pension, un altri i plaseve la bire e o vin dit ‘parcè no fasìno la bire?’ Cussì, cun Piero e Roberto, altris doi socis, a àn scomençât a cirî un puest dulà fâ il stabiliment”. “Si podeve fâlu ancje a Udin – al zonte Pietro Totis, diretôr comerciâl – ma la aghe buine e jere dome achì. Une dì, tornant indaûr di un zîr in biciclete insiemi cuntun gno amì, o vin viodût a Cedarcjis la scrite “vendesi”. O vin fat analizâ la aghe; a Fevrâr dal an passât o vin fermât il stabiliment e dopo pôcs mês o sin partîts cu la ativitât. E je stade une robe particolâr ancje par me che, dopo 30 agns ator pal mont, o soi tornât. Jo o soi di Darte e o soi lât vie de Cjargne cuant che o jeri zovin parcè che cheste tiere mi jere strente. Disìn che il fat di jessi tornât al è stât un alc di magjic; di chi, la idee dal protagonist de etichete de bire che si prodûs, o ben il sbilf, une figure imagjinarie che no esist pardabon ma che si pues crodii”.
“La bire che o fasìn – al conte Marco Maiero – no je pasteurizade ni filtrade. E ven fate cun prodots di prime cualitât. Ingredients principâi a son la aghe, il malt, l’urtiçon e ferments. Di solit il consumadôr al è il zovin che al cîr un gust particolâr, une robe gnove e alc che al sedi diviers”. Pal moment la Di Mont e prodûs cinc versions di bire: bionde, pils (stîl cec), weizen (plui lizere), ambrade e ipa (plui fuarte). “A vuelin vot oris par fâ une cuete; finide la cuete a coventin di cuatri a sîs setemanis di fermentazion par fâ la bire. La bire no dome le produsìn, ma si pues ancje comprâ achì”, al dîs Pietro Totis. “Di Istât o vin il chiosc difûr e lu tignìn viert sabide e domenie. O vin a pene tacade la distribuzion te Val de Bût, o sin presints tai albiercs di Darte e o stin tacant a slargjâ il marcjât a Glemone, Udin, Triest, Pordenon. Dal prossim an o contìn di slargjâsi bande il Venit, la Lombardie e la Emilie. La idee e je chê di lâ ancje di là dal confin talian. Un soci al sta lavorant cul forest: Russie, Cine e Gjapon. O vin tantis ideis di puartâ indevant: une e je chê di fâ jentrâ la bire tes termis, e po inmò cjatâ intesis cu la Latarie di Sudri, cu la sgnape di Cjabie e vie indevant”. Volêso savênt di plui? A chei che ur interesse, ur baste lâ sul sît www.birradimont.com ❚
