BIBIE. Di Diu e di un popul

Si clamarà “Di Diu e di un popul” il documentari che i letôrs a podaran viodi in anteprime te serade di fieste dai 27 di Mai al teatri “Giovanni da Udine”. E che, su supuart dvd, al sarà ancje distribuît a ognidun di lôr dentri te custodie – ricuart che e memorearà la esperience de leture continue de Bibie.
Paolo Comuzzi al è il regjist che al à pensât il sogjet e zirât il filmât, su incaric di Glesie furlane e ARLeF: “I obietîfs che mi soi proponût – al conte – a jerin doi: un plui documentaristic e divulgatîf, peât a chê esperience, e un plui creatîf, ven a stâi il fat di contâ la storie e la vicende de Bibie par furlan e duncje di furnî une vision, un contest plui gjenerâl”.
E il documentari al scomence propit di chest pont. Dal significât che il Grant libri voltât in marilenghe al à vût pai furlans, contant in prin lûc il lavôr fat di pre Checo Placerean e di pre Toni Beline. Materiâl di archivi al fâs scuvierzi la vôs dal prin e lis imagjins dal secont (a son stâts doprâts bocons di intervistis che il predi di Visepente al lassà a VideoTeleCarnia, a metât dai agns Novante). La storie de traduzion de Bibie e ven fate midiant di altris contribûts video: chei di pre Roman Michelot, di Glesie Furlane, di Lorenzo Zanon, president de ARLeF, di bons. Duilio Corgnali, za diretôr de Vite Catoliche, e dal biblist bons. Rinaldo Fabris.
Comuzzi al à lavorât al progjet di Fevrâr a Avrîl. “Di Diu e di un popul” al dure 40 minûts. Par une buine part di chei, in sotfont, si sintin ancje lis vôs dai letôrs volontaris che si alternarin tal Oratori de Puritât. Peraulis che a compagnaran senis di paisaçs furlan, alternadis a imagjinis de contemporaneitât e di vite moderne. «La dicotomie che o ai volût rapresentâ e che mi plaseve cetant – al zonte il regjist – e jere chê dal rapuart jenfri la universalitât de Bibie, libri plui pandût dal mont, e la particolaritât de lenghe furlane. O ai cirût di rapresentâ, midiant des imagjins e dal sun, il rapuart fra universâl e particolâr, il macrocosmi rapresentât dal Libri e microcosmi dal nestri vivi». ■ bibie.org
OSCAR PUNTEL