A fevelâ dal taramot dal Friûl si riscje simpri di colâ te retoriche, di dî robis che a son za stadis straditis, a cjalâ intun moment de nestre storie cuntun voli che aromai al à za viodût dut.
Ma se si va a visitâ la mostre Tiere Motus a Vençon si ven fûr cun alc di plui tal spirt, une consapevolece gnove.
Il fin di cheste mostre al è sì di mostrâ i events sucedûts tal 1976, la disperazion de int, une tiere sdrumade in pôcs minûts, ma no dome. Ce che al ven fûr plui di dut e je une fuarte sensazion di sedi jentrâts in ce che al è stât pardabon il Friûl, prin e dopo di chei acjadiments. Une tiere uniche che e à reagjît in maniere uniche.
Cheste esposizion e je ancje volude par no pierdi la memorie, par riscuvierzi di un continui elements che prime no si cognossevin, par viodi ancje i aspiets positîfs dal taramot sul Friûl.
IL TITUL_ Za il non de mostre nus conte une identitât ben delineade: tiere, par furlan, e motus, par latin, a metin adun dôs lenghis antighis che a àn fat la storie de nestre tiere.
Se po o lin a viodi ce che al jere il Friûl fint in chei agns pal rest dal mont si rindarìn cont che ce che al è stât fat al è stât inmò plui straordenari. O jerin dome “une zone dongje Vignesie”, cence identitât, cence teritoris ben delineâts, ma propit chest façolet di tiere i à dât di insegnâ al mont intîr.
LA MOSTRE_ Jentrant te prime part de esposizion si ven cjapâts dentri di une onde emotive no di pôc: lis fotos dai prins socors, dai prins moments dopo dal disastri a son fuartis, ma a scuegnin contâ ce che e je la realtât de situazion. Nol è facil cjaminâ jenfri lis maseriis, i ferîts, lis riis di cassis, ma si à di lâ indevant par capî.
La cjarte des zonis colpidis e mostre il parcè che chel dal 1976 al ven clamât “taramot dal Friûl”, no son confins, no son paîs plui di chei altris, al è un grant disastri gjenerâl daspò 2500 scossis.
Si môf une grande machine di solidarietât, in gracie ancje dai politics in cjarie in chel moment, ma i furlans a son za a vore, mostrant une dignitât fûr di misure.
LA STAMPE_ Fint in chel moment cuasi discognossût a la grant part dal mont il Friûl al devente il centri de informazion di centenârs di testadis gjornalistichis, ancje in gracie dai gjornaliscj furlans fûr dal Friûl che a pontin lis lûs su chê tiere sdrumade ma ustinade a jevâsi sù daurman.
IL MODEL FRIÛL_ Tancj a son chei che a vegnin a visitâ cheste esposizion par capî ce che al è stât il “model Friûl” post taramot, un esempli di eficience e di capacitât di intervent che al à caraterizât chest event.
Al è un model però che nol è trasferibil in altris contescj, ancje talians, stant che al à cjapât dentri tancj fatôrs che no saressin replicabii nancje chi in Friûl tal dì di vuê. Il moment politic di chei agns, lis cussiencis popolârs, la determinazion di ogni strât sociâl al à puartât a chel miracul che forsit nol sarà plui pussibil replicâ, ancje se al ven studiât di un continui.
In sostance la formule di cheste machine ben inviade e je stade “une ricostruzion, tantis ricostruzions”, dulà che ogni paîs al à podût decidi in maniere autonome cemût tornâ a fâ sù, dentri di un sisteme ben gjestît sedi dal Stât che de Regjon ma sostignût di fonde di dome 3 leçs: la n.17 dal ’76, e la n.30 e n.63 dal ’77. Fondamentâl e je stade la sinergjie tra lis istituzions, tant che il guvier al rindeve garant de aplicazion des leçs propit la Regjon.
LA INT_ No si pues dismenteâ però che dentri di chel model e je stade la volontât di un popul cussient che no si è fat sdrumâ une seconde volte, no cate lis replichis des scossis che a son continuadis par mês e che a Setembar a àn finît par fâ colâ ce che al jere restât in pîts. Cul spirt dal “fasìn di bessôi” a nassin associazions, comitâts e grops spontanis par cirî di risolvi i problemis di prime necessitât. La partecipazion popolâr e salte fûr spontanie e imediade cu la volontât di jevâsi sù: il “Boletin di coordenament des tendopolis”, partît di Glemone dopo pôcs dîs dal taramot, si slargje ancje ai comuns dongje. La int, ancje se aromai scanade, e mande indaûr lis barachis e e reste tes tendis, mandant un segnâl fuart di resistence e di voie di ricostruzion.
PASOLINI_ La mostre si siere cuntune frase di Pasolini: “A vegnarà ben il dì che il Friûl al si inecuarzarà di vei na storia, un passat, na tradision”. Un dai aspiets positîfs dal taramot al è propit chest, o vin tacât a cognossi il Friûl propit di chê sere dai 6 di Mai. ■
Venusia Dominici
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +