Sfuei Mensîl Furlan Indipendent
Archivi de Patrie

BASTIANCONTRARIE. STORIE FURLANE AL FEMININ. Istruzion des feminis e furlan a scuele. La modernitât rivoluzionarie di Anzuline Ianesi

............

Intai agns, dûrs e triscj, de migrazion stagjonâl dai oms, chei Cramârs che jenfri il Cinccent e il Sîscent a puartarin su la lôr schene il pês dal marcjadant, ma ancje la lizerece di ideis gnovis de Cjargne ae Europe, lant e tornant, a jerin lis feminis cjargnelis – restadis di bessolis – che a gjestivin la cjase, il vilaç, la economie e la societât di chel timp. La lôr figure e je ben lontane di chê lamie vignude fûr di ciertis cjançonutis, là che la “femenute” e ven piturade tant che un agnulut, plui preocupade des rosis dal so zardin che no dal agagn de fam. Dal sigûr ubidiente e sotane dal so om, simpri in spiete che al torni, riduçant su la puarte di cjase.

E invezit la piere plui fuarte di dute la cjase e jere propite jê: parcè che, lontan il so om, e organizave i lavôrs tai cjamps e tal ort, e curave la fadie pesante dal falcet sui pascs pui alts de mont, e viodeve des bestiis inte stale, e duncje e molzeve la vacje – uniche e plui impuartante risorse de famee – e preparave la scuete, e leve tal bosc (in chê ete popolât di lôfs e di ors) a bruscjâ e a tirâ sù cjastinis, foncs, butui e lidrîs di meti tal litum.

E come se nol bastàs e partecipave ancje in maniere ative ae vite aministrative de Comunitât, gjoldint dal dirit di rapresentance dal so “fûc”, ven a stâi la famee di apartignince, intal sen de Vicinie, la assemblee dai paisans. La sô vôs, duncje, stant ae struture aministrative de Cjargne di chel timp, e podeve rivà ancje al Cuartîr (dute la regjon e jere dividude in cuatri cuartîrs) e ae fin ancje a chel Consei che al rispuindeve devant dal Gastalt, il rapresentant dal Patriarcje di Aquilee (e po dopo la invasion di Vignesie, intal 1420, al Luctenent di San Marc).

Juste par dâ une idee, tal censiment di Guart, fat intal 1719, al ven fûr in maniere clare che su 164 cjâfs di famee 93 a jerin feminis: une maiorance nete, duncje, che e contribuive a dâ aes Cjargnelis une fuarce reâl, efetive e no dome consultive: a podevin decidi cul lôr cjâf, e lu fasevin cu la responsabilitât di une mari che e viôt e e proviôt pai siei fîs e pai siei vecjos. E dal sigûr no jerin prontis a dî “siôr sì”, a ubidî ai mascjos o ai parons di turni. Intes letaris o intes relazions che i uficiâi di Vignesie a scrivin al Dôs al ven fûr che par lôr al sarès une vore plui facil “fâ cuintri a une bandasse di nemîs turcs che no a une femine di Cjargne”. Cheste responsabilitât e ven metude a fûc di tancj testaments firmâts di feminis in favôr de istruzion des frutis, considerade tant che un imprest di impuartance straordenarie par formâ, educâ e garantî un profîl bon, une dì, di mût di cjapâ sù la sô responsabilitât, ancje la plui seriose, compagne di chê che par solit e spietave ai oms. Dome cussì si spieghin par esempli i testaments lassâts di Zuanute De Giudici di Çurçuvint, intal 1783, e di Madalene De Crignis di Tumieç, intal 1804 – par ricuardâ doi documents jenfri i tancj – là che si scriveve in maniere clare che la intenzion e jere chê di garantî ancje aes frutinis une preparazion che e fos adeguade.

Bisugne interpretâ ta cheste suaze la figure e la opare fondamentâl di Anzuline Ianesi, ancje jê di Tumieç (1728-1815), autore di une opare straordenarie che si varès di tornâle a stampâ in dì di vuê pes grandis sugjestions e pe bielece des argomentazions. Il libri al puarte il titul: “Colloquio sopra gli studi delle donne”, e al fo publicât a Udin intal 1774. Si trate di un dialic filosofic che si imagjine jessi sostignût tra dôs feminis impuartantis, ven a stâi Cristine, la regjine di Svezie, e Arete, mari dal filosof Aristip. Duncje dôs feminis che si interessin de formazion feminîl, dal moment che: “Non lo studio corrompe le donne, ma l’ozio coll’ignoranza congiunto, il quale ha luogo certamente massime nelle donne nobili e agiate”.

Vie pe sô tratazion Anzuline e met une grande impuartance sul fat che lis zovinis a varessin di impegnâsi e cetant intes materiis gnovis, chês che a vegnin consideradis di grande utilitât par une Comunitât, duncje madressint une competence tecniche specifiche e bandonant lis letaris, la poesie, la leterature – miôr lassâlis ai oms, inteletuâi tabacons plens di tos – par dedicâsi a chei temis che inte gnove etât a deventin par une femine di grande impuartance: la agriculture, il cumierç, il marcjadantâ, la matematiche e la medisine. Par dimostrâ ce che e je daûr a dîsi e cite i autôrs di chel timp che jê e considere jenfri i plui brâfs e impuartants, clamant in sô difese Rousseau, Montesquieu, Montaigne, Voltaire e ancje i talians Parini e Muratori.

Modernissime la sô cussience che une lenghe identitarie, di apartignince come il Furlan e pues jessi une vore utile inte formazion, parcè che doprantle si rive plui ae svelte al significât profont di ce che si studie. Une femine cjargnele pardabon rivoluzionarie. ❚

Agnul Floramo

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +