Avualance di gjenar jenfri culture e dirits

La avualance di gjenar in Italie e à vût un viaç lunc e imberdeât. Fin al secul XX i dirits des feminis a son stâts scjars. Dome tal 1946 a àn podût votâ e tal 1948 la Costituzion e à fissât, in mût uficiâl, i dirits compagns dai oms.
◆ Riformis impuartantis a son deventadis decisivis dome decenis indenant. La leç sul divorzi (1970), la legalizazion de contracezion e dal abort – la protezion de maternitât (1971), la revision de leç su la famee cu la sopression de autoritât coniugâl dal om – stes dirits par formazion e lavôr (1975). Di no crodi che il matrimoni riparadôr e il delit di onôr a sedin stâts scancelâts dome intal 1981.
Dal 2001 indenant, biadelore, ancje i paris a puedin cjapâ permès par stâ daûr ai fîs piçui.
In dut câs, il ricognossiment legâl nol à parât vie in automatic lis disparitâts culturâls e economichis.
Di fat, tal 2024 in Italie il nivel de ocupazion feminine (15-64 agns) al è stât dal 54%. In Friûl -Vignesie Julie 64%; miôr, ma ancjemò distant de medie europeane dal 71% (dâts ISTAT).
◆ Meti sù famee al manten valôr positîf, ma al mostre dispès une distribuzion sbaliade dai rûi. Ancje se a lavorin, in maniere implicite si spietisi des feminis che a puartin indenant la cjase e la cure dai parincj. Di medie, cinc oris in dì (cence jessi paiadis) cuintri lis dôs dai oms. Cheste asimetrie, unide a un welfare no suficient o masse cjâr in merit di asîi e ricovars pai vecjos, lis oblee dispès a sielzi jenfri lâ a vore e viodi de famee. Une cjame di cheste fate e segne in maniere pesante oportunitâts di lavôr e cariere. Cun di plui, il divari salariâl e i contrats a timp parziâl imponûts dispès dai datôrs di lavôr a pesin un grum.
◆ Altri aspiet culturâl che al salte fûr dai modei sociâi mufulîts al è chel dai stereotips di gjenar che a condizionin lis frutis za de infanzie. Come se nol bastàs, ancje inte istruzion superiôr lis fantatis a vegnin discjoltis dai studis sientifichis e tecnologjics che a dan, e a daran, pussibilitâts di lavôr e cariere in setôrs strategjics. Par di plui, in gjenerâl in dì di vuê l’acès a puescj di lavôr di nivel alt al reste misurât pes feminis.
◆ Tra i tancj aspiets economics, la avualance di gjenar e influence ancje il PIL che al mostre ben la ricjece di un Stât; la Bancje di Italie e stime che se il lavôr des feminis al fos ai nivei di chel masculin (72% intal 2024) al cressarès, su par jù, dal 7%.
◆ Tra lis manifestazions plui gravis de disparitât e je le “violence di gjenar”. La cuistion e je critiche e lis leçs no fasin avonde; al covente un cambiament culturâl radicâl. Lis denunziis aumentadis a rimarchin che l’afâr al è seri; dibon, e je cressude la tindince a segnalâ i câs.
◆ La avualance di gjenar in Italie e je duncje une disfide tra tradizions ledrosis e afermazion des identitâts. No dome une cuistion di justizie, ma ancje di rispiet, libertât di sielte e disvilup personâi e sociâi. Impegnìnsi ducj a discuti dal teme cun fruts, amîs e coleghis stant atents, cun di plui, al lengaç che o doprìn. ❚