Avôt dal Friûl a Aquilee

Domenie ai 13 di Lui aes 6 dopomisdì si cjatarìn a Aquilee pal Avôt dal Friûl in ocasion de ricorence dai Sants Ermacure e Fortunât, prin vescul di Aquilee e il so diacun, nestris Patrons.
I predis di Glesie Furlane a celebraran la messe par furlan cun leturis par slovene e todesc.
E sarà ancje la ocasion pe nestre Redazion di incuintrâ i nestris letôrs e resonâ su la situazion dal Friûl.
«Aquilee e je come un grant poç di aghe, là che plui si va in sot e plui glaçade e je la aghe. Chê aghe che e à ristorât la sêt di gjenerazions e gjenerazions. Come cu la aghe dal poç, cun Aquilee no si rive mai a dî dut, di tant feconde che e je cheste risultive. Aquilee e je come une miniere che si sprofonde tal timp e te tiere. Plui si va in dentri e plui si intivisi in tesaurs che no si cjatin di altris bandis. Cirìn, usgnot, di jentrâ spiritualmentri in cheste risultive di aghe vive e in cheste arcje di minerâi preziôs». (pre Antoni Beline, 2005)

Redazion