Sfuei Mensîl Furlan Indipendent
Archivi de Patrie

1914-2014 IL CENTENARI DES BAUSIIS E DE VERGOGNE. Profugancis

Agnul Floramo

Scomençade cul prin numar dal 2014, ve ca la nestre “cuintristorie” de prime vuere mondiâl memoreade chest an. Une grande tragjedie che e à puartade la muart di tante puare int, e che in Friûl e à metût furlans cuintri furlans in non di decisions cjapadis parsore dal lôr cjâf. Nô o contarìn storiis e aspiets de cuistion che la retoriche dai Stâts nazionâi no à mai contât. (5e pontade)✒ Redazion

Une des plui grandis vergognis, mai contadis e simpri tignudis pladis parcè che a pucin di crimin cuintri la umanitât, e fo la deportazion di miârs di civîi in cjamps di concentrament gjestîts dai militârs talians vie par dut il periodi de vuere. Si tacà a disvuedâ dute la zone dal front. La int e scugnî sbandonâ lis cjasis, i cjamps, i nemâi. Dut al fo recuisît e puartât vie dai militârs. Lis abitazions privadis dopradis come cuartîr pes trupis, o come magazin, o semplicementri sbandonadis, a disposizion di laris, robariis e carognadis. A dute cheste int e va zontade ancje la popolazion di chei teritoris che e vignivin “liberâts” de Italie. Lis categoriis plui colpidis a forin i citadins oms, jenfri i disevot e i sessante agns, di ducj chei teritoris che si cjatavin a est di Cormons e a nord di Pontebe. Bielzà tal 1915, a pene sclopade la vuere, il numar dai dispatriâts al jere calcolat sui 47 mil. Fin di subit i prefets talians a sfrutarin cheste ocasion par dâur cuintri ancje a chei personaçs che di simpri a manifestavin une cierte oposizion politiche e ideologjiche tai confronts des istituzions. Bolâts tant che “austriacants”, spes segnalâts di denunciis anonimis, che a son simpri “pelosis”, ven a stâi indreçadis di chei che a vuelin regolâ i lôr conts privâts: tal grop a forin mitûts dentri muinis, predis, adiriture cualchi vescul, insegnants, inteletuâi, ma ancje ostîrs, cjaliârs, faris: dutis categoriis incriminadis parcè che a contat cu la int, e duncje sospietâts di jessi provocadôrs cuintri la vuere, la bandiere taliane, il guviar dal gnûf stât talian che al jentrave in tiere austriache, ancje se chê tiere si diseve di liberâle di un opressôr forest, injust e trist. I lûcs di detenzion a forin pal plui concentrâts in Sardegne ma ancje tes isulis che cualchi an dopo a deventarin lûcs di internament doprâts dal regjim fassist: Ponza, Lipari, Ventotene, Lampedusa. Dute cheste puare int, deprivade di ogni ben, slontanade dai siei lûcs, cul grop in cûr di vê sbandonade la sô cjase, i pôcs nemâi che a garantivin un pôc di sostentament, a cjapavin dal guvier talian une lire in dì par vignî incuintri a dutis lis lôr esigjencis. Une lire in dì! Cussì nus conte la professore Giovanna Procacci, de universitât di Vignesie, che in chescj agns Matteo Ermacora, zovin e brâf ricercjadôr furlan specializât inte prime vuere mondiâl, al à firmât di pôc une interessantissime ricercje su la condizion des feminis in chest contest cetant dramatic e vergognôs. Il studiôs al à metût in clâr che lis autoritâts talianis a cjatarin, intai paîs furlans sot de Austrie, dome che feminis, vecjos e fruts, stant che i oms a jerin a scombati sul front, aes voltis une vore lontans, vie pe Galizie, cuintri dai rus. La consultazion dai archivis militârs lu à puartât a calcolâ che lis feminis internadis a forin adiriture il 20% di ducj i deportâts. Acusadis di jessi austriacantis, o adiriture di sedi dopradis tant che spiis dal nemì. O dome parcè che il lor cognon nol jere talian. A vevin une etât comprindude jenfri i cuindis e i setante agns. Dispès a puartuarin daûr i lôr fîs. Dome a Çarvignan 10 feminis a forin internadis parcè che fiis di nemîs de Italie, altris 10 a jerin massariis, cuatri a tignivin un albergut, dôs a jerin mestris. E po dopo a son nomenadis ancje une coghe, une infermiere, une camarele. Insome, come che si pues viodi, dutis periculosis infiltradis di Viene che a cospiravin cuintri la talianitât e la bandiere! In Cjargne, a pene sclopade la vuere, a restarin blocâts inte tiere di nissun une vore di paisuts. Lis feminis a profitarin cirint di mantignî il contat cu la parintât austriache: un leam di afiet che si concretizave cun cualchi letare, o pluitost cuntune cosse jemplade di une fuiace di pan, un butilion di vin, cualchi bleon, une scaie di formadi. E cuant che a rivarin i talians a forin propite chestis feminis a colâ tal mirin dal suspiet e a sedi condanadis ae deportazion. Une vore suspiet al fo considerât il plurilinguisim. Savê fevelâ sloven, todesc o furlan al jere indizi di “sospetta connivenza con il nemico”. In plui, in timp di vuere, a jerin lis feminis che a levin in malghe, o che a continuavin a “cramâ” sul fîl dai confins. Dutis ativitâts che lis fasevin suspietâ di jessi spiis dai mucs. Simpri Ermacora al fâs notâ che dispès il sintiment feminin al jere manifest cuintri i talians, massime i uficiâi, viodûts come chei che a obleavin fîs, oms e fradis a lâ a murî in trincee. E cussì aes voltis a sabotavin, o pûr a contestavin dut ce che al jere talian: bandiere, divise, manifescj o ancje segnaletiche stradâl. Plui di cualchi mari, in segn di contestazion, e à vût la “sfrontatece” di clamâ la fie “Germana”. Chel al bastave par sedi deportâts dai talians. O ancje il refudâsi di bevi in onôr dal re. Tantis di chestis feminis, lontanis di cjase, cui lôr vecjos e i fruts di mantignî, a scugnerin cjatâ di ce vivi vendint il lôr cuarp ai soldâts. Cu la conseguence di un increment di fruts nassûts cence pari in condizions precariis e al limit de sussistence. Ma chest straordinari paîs che e je la Italie al veve il mût di intervignî par risolvi ducj chescj câs pietôs e tragjics. Nol è râr di fat che il probleme dai dispatriâts al fos risolt in curte mitraliant cui avions su lis coloniis o sui cjamps là che a jerin confinâts. ❚

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +