Sfuei Mensîl Furlan Indipendent
Archivi de Patrie

Autonomie e pês che a calin

............

Se za dopomai al fâs vignî i sgrisui lei e sintî a fevelâ di “piçule patrie”, passìn drets ae “microscopiche”. Parcè che se lis dimensions fisichis dal so teritori a restin compagnis (a dispiet, par altri, di istancis popolârs che a domandin di timp di podê aderî), la sô autonomie e il so “pês” politic a son daûr a pierdi simpri plui…teren. Cundut dai leams tant strents tra i vertiçs de Regjon e chei dal Guvier centrâl…
Il 2014 che si è daûr a sierâ nus à puartade une schirie di elements di riflession: il câs Latterie Friulane, ponte dal iceberg de assence di une politiche regjonâl intal setôr dal lat e dai siei derivâts (di positîf al è che la vicende des Latariis e à intiziât un cambiament positîf inte impostazion de bande di Coldiretti e Consorzio Agrario, che a àn scomençât a operâ fasint scuadre); la fusion – clamìnle cussì, cuntun eufemisim – tra la multiservizi Amga di Udin e la emiliane Hera, operazion che a tancj (soredut esponents de oposizion in Comun a Udin) e je parude par altri pôc trasparent; la creazion di une sole societât tra Venit – che al deten la maiorance – e Friûl-Vignesie Julie, cu la fusion di Friulia Sgr e Veneto Sviluppo (di sotlineâ che Friulia Sgr e jere stade individuade, par altri, par gjestî i previodûts fonts pension regjonâi…). E fin chi o sin dome aes sorpresis de prime part dal an, che no podevin ciert finî li.
Intai mês passâts, fasint une panoramiche de situazion logjistiche regjonâl, o vevin evidenziât cemût che l’aeropuart regjonâl di Roncjis di Monfalcon al ves sielt di lâ indevant cu la proprie ativitât, mantignint il propri isolament splendit cundut che dilunc dai agns si fossin cirudis aleancis cun altris aeropuarts, in primis cu la Save di Vignesie. I dineis continuis no àn prodot risultâts preseabii (a part la sorevivence in cjarie di un Cda e de struture gjestionâl), intant che Vignesie – midiant des progressivis aleancis cun Trevîs, Verone e, cumò, Brescia, e à continuât il so plan di espansion. Morâl: di Roncjis furlans no ‘nt partissin plui, intant che i aeropuarts venits a son simpri plui plens.
Par une ocasion – la enesime – pierdude, ve cumò al orizont une gnove oportunitât, ma in chest câs no si sa trop positive: la idee di fondi intun unic pôl che al cjapi dentri il teritori dal Venit, dal Trentin, dal Friûl e de provincie di Triest dutis lis concessionariis autostradâls locâls. “Nus darès plui fuarce contratuâl pal acès al credit e pai apalts”, a sostegnin i promotôrs, e tra chei i sodisfats Tosi e Zaia, ducj i doi venits… Par Autovie Venete, che a son sot cu la dificile partide dal otigniment dai finanziaments pe tierce corsie, al sarès cence dubi un balsims, sot chest profîl. Al reste però di viodi cualis consecuencis la creazion di cheste societât e podarès vê pe Regjon, che in Autovie e à cjatât fin cumò il propri bancomat, la proprie tesorarie, di là di une font di finanziament par altris comparts dal belanç regjonâl (pensait, come che al è sucedût in passât, ai utii invistîts par esempli inte sanitât).
Al è dopo un altri aspiet, che cu la economie al à a ce fâ in maniere indirete: il Friûl-Vignesie Julie si è viodût “gjavâ” la Direzion scolastiche regjonâl, deventade une dipendence di Vignesie. Intun moment che si rimarche la simpri plui grande urgjence di une riforme che e pei simpri plui la scuele al teritori, ancje pe individuazion e la formazion di specifichis professionalitâts buinis pes aziendis locâls, al è un slontanament che nol pues no prejudicâ la economie locâl. Che, di bande sô, in fin dai fats si è savude difindi ancje chest an, in gracie soredut de domande foreste. In cualchi câs (che si lei: Mangiarotti-Westinghouse) il rivâ di aziendis o capitâi forescj al à consintût di mantignî sul teritori ativitâts produtivis (e puescj di vore), confermant che sul Friûl si pues ancjemò invistî. Almancul fin cuant che lis sieltis politichis no nus ridusaran a une dimension tant microscopiche di no rivâ plui a jessi individuabile su la cjarte gjeopolitiche mondiâl. ❚
Linux

Apontaments / AVÔT DAL FRIÛL

Redazion
Furlans,a son passe 50 agns che si cjatìn a Aquilee la dì de fieste dai sants Macôr e Fortunât palAVÔT DAL FRIÛLe o cjantìn Messe te nestre lenghe, tal spirt di chê libertât che si iludevin di podê respirâ almancul in glesie scomençant a doprâ il Messâl, che al è ancjemò intune spiete penose par […] lei di plui +

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +