Sfuei Mensîl Furlan Indipendent
Archivi de Patrie

ATUALITÂT. Zornade furlane dai dirits

............

Par no dismenteâ, ma soredut par continuâ a puartâ indenant cun impegn e cu la rason la bataie de lote e de rivendicazion dal dirit dal popul furlan a fevelâ cun autonomie la proprie lenghe, a fâsi ricognossi la proprie nazionalitât ma ancje: la salût, il lavôr, la cjase, la istruzion e l’ambient.
Chest, in struc, al è il significât de ricorince de Zornade Furlane dai Dirits, che si davuelzarà ai 27 di Fevrâr e che il comitât 482 al puarte indenant za di un pôcs di agns.
IL RIVIEL DAL Popul_  La storie di sigûr e je une vore clare di chê bande e si à di lâ indaûr fintremai ai 27 di Fevrâr dal 1511, cuant che e je state metude in vore il plui grant riviel de storie furlane, par man des comunitâts rurâls che, plenis di coragjo a àn assaltât e dât fûc a ducj i palaçs dai siôrs e ai cjistiei in Friûl.
Une grande dimostrazion di caratar che, ancje se e à puartât a tant sanc, e je stade la mari di altris impuartants passaçs, come la nassite venture dal ordin de Contadinance.
CUSSÌ CHEST AN_ Ma ce prospetivis puedino jessi sul significât de zornade di chest an? Secont il puartevôs dal comitât 482 Carli Pup: “No si trate di fâ sintâ la proprie vôs dome intal cjamp de lenghe e de nazionalitât, che pûr a restin i grancj ponts principâi di cheste zornade, ma ancje fâ rivâ a la int la cussience che in gjenerâl a son tancj i dirits che rispiet al popul furlan a vegnin tibiâts. In dì di vuê mi vegnin tal cjâf – al à continuât Pup – lis grandis cuistions ambientâls, come la Tav o l’eletrodot Redipulie – Udin ovest e mi domandi se a coventin pardabon ai furlans o no? La Tav par esempli e varès di taiâ tal mieç dute la Basse Furlane, par rivâ fin a Triest. Ma par esempli cence une fermade in Friûl. A ce nus coventie? O ce utilitât puedial vê l’eletrodot, se il Friûl al à za avonde energjie pal vivi di ogni dì. Forsit a produsi di plui energjie par dopo vendile fûr dal Friûl. Ma a la int furlane dut chest covential?”
AUTOGUVIER_ Une zornade insome che e vûl pontâ il dêt su la convinzion che il Friûl al à di rivâ a jessi une Regjon cu la capacitât di autogovernâsi, no dome a peraulis, ma cui fats.
“Si fevele tant – al à continuât Carli Pup dal comitât 482 – di un Friûl come plateforme logjistiche o di “Regjon puint”… Ma o varès voie di savê ce che si intint par chest? Forsit si à chê di fâ in regjon un grum di infrastruturis di passaç pai forescj, che no coventin diretementri al Friûl e ai furlans?
TANTCJ TEMIS _ A son tantis duncje lis cuistions in pîts par chel che al rivuarde la Zornade Furlane dai Dirits, che dut câs, ogni an, e varès dibisugne simpri di plui “reclam” sui gjornâi, par television e radio dal Friâl. Un pôc come che di agns e fâs Radio Onde Furlane di Udin, che su lis frecuencis dai 90.0 MHz, inte zornade dai 27 di Fevrâr e propon une programazion dal dut speciâl, metude adun pensant propit al significât de Zornade Furlane dai Dirits.
Dal rest, l’intindiment dal comitât 482, come che nus à dit il so puarte vôs Carli Pup al è: “La Zornade Furlane dai Dirits e je un barcon viert su dutis lis cuistions dai dirits, tacant de lenghe furlane e de nazionalitât. Noaltris – al à continuât Pup – fasint fieste ai 27 di Fevrâr, o mostrìn pardabon la muse dal Friûl resistent, chel che al alce in cjâf”!
Enrico Turloni

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +