ATUALITÂT – Une Regjon in ritart

Tant che Partît Democratic o vês cjapade une posizion clare su la politiche linguistiche inmaneade de zonte Tondo. Cemût si podaressie descrivi, in struc, la vuestre posizion?
“No vin platade la nestre preocupazion par une sorte di involuzion. Baste spiâ i fats: struturis depotenziadis cun personâl precari e simpri ridot. Riduzion progressive des risorsis e in cualchi câs cancelazion totâl, e ritart inacetabil te aplicazion des leçs. A testemoneâ la impuartance de nestre azion, il partît a ducj i nivei politics e istituzionâi – duncje, la segretarie regjonâl, il vice provinciâl, e il cjâf grup a nivel regjonâl – al è compat e concuardi. Chi, bisugne sburtâ la maiorance de Regjon a cambiâ direzion.”
Ce no isal stât fat?
“Il centri çampe al veve une idee clare de politiche linguistiche, le veve sostignude te maniere juste. Cheste aministrazion invezit e torne a marcâ il concet fat bon in campagne eletorâl: il furlan nol è une prioritât”.
La zonte e fevele di tais necessaris par vie de crisi.
“Ma se a van indenant a stracâ bêçs di altris bandis! Dut câs, si pues ancje discuti dulà spedâ. Ma par spedâ e coventarès, prime, meti in vore lis leçs za inmaneadis.
Dulà sono lis pecjis?
“In dutis e trê lis areis di azion. Cjapìn la scuele, o vin il 63% di domandis pal furlan in classe: chescj fruts a varan dineât il lôr dirit. O domandìn la aplicazion de leç e dai regolaments. No si à viodût ancjemò nuie. La comission e à lavorât vie pal Istât, ma no à ancjemò vût il bon acet finâl. Pai media, l’an passât la aministrazion e veve azerât i fonts pai programs in convenzion in furlan su radio e televisions privadis, lassant chei pe Rai.
Molinaro si jere esponût in prime persone par tornâju a ripristinâ.
Molinaro al veve dit che i fonts a saressin stâts recuperâts dai cjapitui de convenzion Rai, viodût che cul inseriment dal furlan tal contrat di servizi i programs a saressin stâts paiâts de Rai. Però forsit a àn vendude la piel dal ors masse adore. Il contrat di servizi nol è stât ancjemò firmât e la Rai, dut câs, e dîs che no à i fonts. Tal belanç dal 2011, al è stât scancelât sedi il cjapitul sul furlan in Rai che chel des emitentis privadis. Si à  scancelât dut. Di fat, nol è stât ancjemò aprovât il regolament che al va a premiâ cul finanziament cui che al lavore di plui e miôr, ven a stâi la cualitât.
Voaltris ce proponêso?
Il Partît Democratic al à presentât doi ordins dal dì: un al domandave la atuazion de leç regjonâl 29/2007 e chel altri la aplicazion dal contrat di servizi de Rai. Il cjâf grup al à sburtât un control su lis azions de maiorance, midiant de presentazion di mozions prime de variazion di belanç, e emendaments pai setôrs strategjics, taiâts fûr dai finanziaments. De Anna al à za rispuindût. Nus à confuartâts su pe Rai: une volte fat il contrat di servizi, ae television di Stât i tocje fâ e vonde. Ma o crôt che ae situazion i coventi un pocje di plui di atenzion. Su la scancelazion, al à minimizât disint che al à metût il so impegn a rimeti i fonts cu lis variazions di belanç.
O starìn in vuaite, o vizilarìn.
Fabbro, lui al à fevelât e al va indenant a sostignî un ategjament compat dal so partît in materie di politiche linguistiche. Al Pd, però, al è iscrit ancje il sindic di Pordenon – Sergio Bolzonello – che no le pense cussì, viodût che di resint al à clamât fûr la citât de aree tutelade de L.482/’99.
“La nestre posizion e je cuntri de politiche linguistiche dal centri-drete. Lis robis a son stadis declaradis de Segretarie regjonâl che e rapresente dut il partît. Dopo al è clâr che a esistin sensibilitâts diferentis”.
Sensibilitâts diferentis?
Nô o vin tirât fûr une cuistion in Regjon. Lui mi sta fasint l’esempli di un sindic. Al è clâr che ancje Moretton nol à une sensibilitât compagne di un esponent de provincie di Udin. Ma o stin fevelant di un partît, dentri di chel centri çampe che al à fate la Leç 482/99, e lis leçs regjonâls 15/96 e 29/2007. Bon, al è un comun e no soi dacuardi cun Bolzanello. Ma la cuistion e je une altre: culì e fale la politiche linguistiche regjonâl. Mi pâr che e sedi cheste la urgjence, no Bolzonello.
Oscar Puntel