Sfuei Mensîl Furlan Indipendent
Archivi de Patrie

Une base missilistiche a Rivolt?

Antonella Lanfrit

I sindics dal Friûl di Mieçsi tornaran a cjatâ chest autun cui sorestants militârs par vie dal gnûf sisteme di difese missilistiche che al varès di rivâ a Rivolt, sît des Frecis Tricolôrs.
“Dut câs – al sotlinee il sindic di Codroip Vittorino Boem – chel che o vin vût ai prins di Mai cul gjenerâl Roberto Corsini, comandant des Fuarcis di combatiment de Aeronautiche militâr – mi à parût trasparent e onest e par nô la prospetive no varès di jessi di pôre”. Cul gjenerâl si son cjatâts i sindics di Cjamin, Cjampfuarmit, Flaiban, Listize, Pasian di Prât e Sedean.
Al pararès che, soredut dopo dai 11 di Setembar, i Stâts a vedin di atrezâsi cuintri i atacs dai missii, che tes gnovis logjichis di terorisim e vueris a saressin doprâts plui che no i avions.
“In cheste suaze – al dîs Boem – secont ce che i militârs nus àn spiegât, Rivolt al sarà il centri di adestrament des personis che a àn di savê doprâju. Par altri, il gnûf sisteme missilistic al è mobil, duncje si sposte dulà che al convente. Pal moment no à fonde la idee che il nestri sît al deventi un arsenâl”. Te base che cumò e ospite sù par jù 400 personis, rispiet a lis 800 di cualchi an indaûr, tai prossims agns a varessin di zontâsi cent e cincuante militârs, ma in forme graduade.
Il sisteme missilistic in cuestion si clame Spada (acronim di Sisteme di ponte automatizât pe difese aeree) e, al conte ancjemò Boem “al è chel che al è stât doprât ancje par difindi il cîl sore Gjenue cuant che al è stât fat il G8”. Al è jentrât in servizi tor de metât dai agns Otante, par difindi aeropuarts cuintri atacs a basse o bassissime butade.
Il sisteme, stant a ce che si sa, al è fat di une centrâl di avistament e di trê sezions di fûc. La prime e je fate di une antene (che e à un radar clamât Pluto) e dai grups par dâ curint eletriche. La sezion di fûc, invezit, e conte une antene pal radar, Falco, e la “console” operative. Cun di plui al à doi lanciadôrs cun sîs missii ognidun.
Daspò l’incuintri di Mai cul gjenerâl, i sindics a àn cjapât l’impegn di informâ ben i citadins su lis prossimis novitâts e cui militârs a son restâts dacuardi di vê incuintris periodics.

____________________________________________

Al plûf sul bagnât
Par cetancj di lôr lis Frecis tricolôrs a son un simbul dal Friûl e di conseguence a rapresentin i “valôrs” di cheste tiere. Noaltris dal comitât No Amx no le pensìn cussì par nuie. Nô o crodìn che i valôrs vêrs a son chei inlidrisâts chenti, nassûts e coltâts dal vivi di ogni dì de int, e no imponûts come che al è stât fat passe cuarante agns indaûr. Viodi che tal salon internazionâl dal turisim al sedi un avion de P.A.N. a rapresentâ la nestre tiere no nus à jemplâts masse di braure.
Nô si varessin spietâts di viodi “in mostre” lis nestris particolaritâts: lis lenghis, lis culturis cussì unichis e origjinâls, il nestri inzegn, la ricostruzion rivade insom, lis bielecis de nestre tiere. Secui di culture rimplaçâts di un avion. O dîs chest pensant al sfuei che al publiche chestis riis, che al à simpri pandût i valôrs inlidrisâts insot intune realtât plui uniche che no rare, cence dismenteâ un altri fat: la int che e scugne stâ sot des “alis” di cheste realtât mâl glotude, parcè che la int ator vie dal cjamp di Rivolt no pues vivi ben cul pericul scuasit cuotidian che al diven des provis de P.A.N..
Chei che a comandin là dentri, tal cjamp, no àn mai vût grande atenzion pe realtât che e je fûr de lôr palade, a àn simpri fat ce che che ur comude, come cuant che, ultimementri, a àn “planificât” di slargjâ lis competencis de base, fasintle deventâ une base missilistiche.
Po si àn coret disint che il sît al sarà un centri di istruzion pal personâl che al varà di doprâ i missii, che naturalmentri a saran ancje inte stesse base.
La plui part des informazions a son rivadis ai “nestris” aministradôrs in gracie dai gjornâi, no diretementri dal comant: un segnâl ancje chest dal “valôr” che par lôr e à la int e i siei rapresentants. La P.A.N. e torne a vê compagnie e nô no crodìn che e sedi une biele compagnie, ma juste une “penetrazion” che e incrès in maniere sordine la pericolsitât dal puest.
I AMX si viodeviju e si sintiviju a svolâ, i missii impen no, e alore ce che no si viôt e no si sint, nol da fastidi, ancje se al è cetant pericolôs, e duncje nol covente domandâ sigurazions ni verifichis, che po a contin ce che a vuelin, ancje sore.
Nô, par altri, si domandìn cui che a saressin i gnûfs nemîs, par cui covential un sisteme di difese di chê fate, par parâsi di cui? Bastial che la ex URSS e torni a alçâ la vôs par justificâ dut chest? O forsit par fâi cuintri al terorisim, un terorisim che che al dopre curtissuts (come ai 11 di setembar dal 2001 a New York) o di int che si fâs copâ cul esplosîf sot de gjachete? Coventino propit missii par dut chest? No si rive a capî lis intenzions, e nancje parcè che si varès di acetâ chest ultin sacrifici.
Comitât No Amx

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +