Flop par furlan si dis flop, e no esist nissune braure nazionalitarie che e puedi tignîlu platât dopo lis elezions. E je ancje lade ben, parcè a la int forsit, no jere dal dut clare che cualchidun si fos presentât come fuarce autonomistiche. Ma e je pûr veretât che dopo tancj agns, la peraule Friûl e je sparide dal risultaât eletorâl. Di cui la colpe? Di ducj e di nissun, si podarès rispundi e cussì fâ fente che nol sedi sucedût nuie. Al sarès logjic cuasi, viodint in ce maniere che e je lade indenant la gjestion de partecipazion o mancul a lis regionâls, provinciâls e comunâls di Udin. La partence, come idee e podeve jessi juste, ma e je partide tart, cun imprest falât e soredut cuntun pinsîr di fonde che no si tacave a la realtât.
Tal Istât, intune tabaiade di front a la dighe di Grau, tra il sotscrit e Marco De Agostini e vegnive fûr la ipotesi di un acuardi tra ducj chei che a fasevin riferiment al autonomisim furlan in viste da lis elezions. Jo o pensavi che la iniziative e ves di partî dal Moviment Friûl, Marco al pensave a une cunvigne par verificâ la ipotesi tor Otubar. O sai che dopo ancje di bande di altris, Pascolat e Visintin in primis si jere rivâts a conclusions de stesse fate. Mi pareve une robe buine, ma a De Agostini o vevi sclarît che il progjet a podere saltâ fûr dome traviers un percors di mobilitazion dal gjenar “primariis” che al jere puartât indenant dal PD. O disarès che il flop al è scomençat di chi, parcè che dutis lis riunions a àn dimostrât in maniere clare che no esisteve nissune struture organizade per tignî in pîts la ipotesi e che cui che le veve, no il Mf, ma il Front furlan, le veve tant piçule di no brusâle. Chê di Strassolt e jere funzionâl dome a lui e a la Grillo. I comitâts, a scomeçâ di chel di D’Aronco e Baracêt, no vevin nissune intenzion di messedâsi, cu la scuse di jessi une sorte di Onu de furlanitât. Garibaldi e i cjargnei a colavin te vuate di Grillo. Chei da basse no si fidavin o forsit nissun ur a mai domandât nuie! O lassi per ultime Convergjence. Mi displâs par Sergio, ma purtrop si scugne partî da la sô esperience par tirâsi fûr dal paltan. Cecotti al è la dimostrazion di ducj i erôrs che o vin fat fin cumò. O crôt che e sedi la figure ancjemò plui rapresentative e impuartante dal autonomisim furlan, ma tal stes timp l’erôr plui grues che o vin fat. La identificazion intune sole persone de bataie autonomistiche e puarte a distruzi il moviment, a viodi la politiche come une serie di acuardis cui partîts talians, une sorte di continue mediazion. Cuntune diference che tai prins moments al jere Cecotti che al imponeve la discussion e i tiermins di cheste, dopo al è stât dut un cori daûr da lis sieltis di chei altris. Il destin e mi displâs che a àn fat i siei oms, chei di Convergjence, sbalotâts dentri listis che no centravin nuie cun lôr, e je une altre dimostrazion che nol baste un leader par fâ un partît. Come che no baste une storie e un consei dai savis par pensâ che vuê il Mf al sedi une realtât vive e vivarose.
Duncje, se cun umiltât o pensìn che lis elezion a son stadis une batoste, forsit la plui pesante dai ultins agns, o vin cualchi sperance di tirâsi fûr di chel cacan che o disevi prime. Jo personalmentri o soi par cjapâmi lis mês responsabilitâts, cun cui che al pense che si scugni no molâ. Anzit o soi plui convint di prime, par la clarece che cumò e je fate su ducj i protagoniscj di chei ultins agns. E si scuen partî da lis prossmis aministrativis, in ogni Comun che al va al vôt in Friûl. O si crôt di jessi une alternative al sisteme talian o si è sotans e no bisugne plui lamentâsi.
Dree Valcic
___________________________________________
Votazions cence partîts furlans: lis opinions
Nissun partît furlanist e autonomist dentri dal emicicli di Place Oberdan a Triest. I moviments storics des istancis furlanis no si son nancje presententât aes ultimis elezions pal consei regjonâl dal Friûl-VJ. Parcè?
Alessandra Guerra, daspò de jessude de Leghe nord, no si cjate plui ator. Si sa che e je daûr a passâ un moment di polse e riflession cun se stesse, ancje in relazion ae complicazion dal cuadri politic che le à viodude fintremai a cualchi mês prime protagoniste de oposizion al stes Illy. Par Marco De Agostini, dal “Moviment Friûl”, e mancje une unitât di intindiments, in stât di fâ un front compat e di crodi in chest ideâl: «A nassin partîts – al spieghe il segretari dal Mf – che si dan chest titul, juste sot lis elezions. E che dopo no àn nancje i mieçs par lâ indenant. Il fat al è che l’autonomisim vuê al da fastidi a ducj i doi i blocs: nol à di jessi ni di drete, ni di çampe. Nol à di rindi cont al podê centralizât».
Gjelosiis, confusion, e cavii. Un cuintri chel altri. Cussì si son sfassâts i furlaniscj. «Doi agns za fa o vevi fat un sondaç: la int e à sensibilitât viers chest teme. Il probleme al è che i furlans no rivin adore a metisi adun, a organizâsi», al spieghe invezit l’ex president de provincie di Udin, Marzio Strassolt. Ma par vignî fûr di cheste situazion, ce si podaressial fâ? «Tirâ fûr il cjâf de tiere – al spieghe Strassolt – vignî fûr dai particularisims. Al covente un grant moviment cuntune fonde popolâr e une colocazion politiche moderade. Un model, par esempi, al podares jessi chel de Cdu todescje». Dongje di chestis motivazions, dut câs, la cause e je ancje de leç eletorâl regjonâl. «Liberticide – le definìs Alberto di Cjaurià, autonomist e furlanist –. Il sparagn dal election day nol à permetût ai piçui partîts di tirâ sù lis firmis che a coventavin, in timp. No bastavin dîs dîs par plui di 4 mil firmis. Po ancje la cuistion dai finanziaments. Se no si à une organizazion che e vedi un respîr finanziari e je une imprese lâ indenant e cirî di metisi in competizion cui grancj partîts e cui lôr bêçs». Critiche ancje la analisi di Franco Simeoni, dal “Front Furlan”: «Lis divisions di vuê – al sclarìs – a son il spieli di un mût vieli di intindi l’autonomisim. A esistin moviments che su la cjarte si disin storichementri dongje di chest ideâl e a pretindin di dâ une patent di autonomisim a cui che a lôr i pâr». Propit il “Front Furlan” al fo protagonist de iniziative par une liste uniche tes passadis regjonâls. «Si scugnarès tornâ a començâ cun umiltât, cence “sputanâsi”. Tacant dai piçui comuns», al siere Simeoni.
Oscar Puntel
