ATUALITÂT – Une aziende svelte… par furlan

La Rhoss S.p.A. e je une aziende cun sede a Codroip, là che si produsin grancj implants pe climatizazion di ambients sedi civîi che industriâi. La aziende, di cirche 350 impleâts, intai ultins agns e sta cirint di riorganizâ lis sôs ativitâts internis doprant i principis de «lean manufacturing», ven a dî de manifature agjil. Chescj principis a son deventâts famôs intal mont in gracie dal sucès de cjase automobilistiche Toyota che, midiant di lôr, in 50 agns e je deventade di anonime e microscopiche fabriche di machinis, il prin produtôr mondiâl dal setôr.
FILOSOFIE GJAPONESE_ Lis ativitâts di miorament a son puartadis indenant midiant cantîrs «kaizen», che e je la peraule gjaponese che e vûl dî «operâ pal miôr» e si che duncje «miorament».
Par comunicâ a ducj i adets ce che si sta fasint in aziende cui varis «kaizen», la Rhoss e à decidût di pandi ogni trê mês al so interni un gjornalut e di sielzi un logo pal percors di miorament che al sta interessant la aziende.
Il logo sielt al è il famôs «road runner» (il Bip-Bip, par dîle clare) dai cartons animâts di Wile E. Coyote cu la scrite par furlan «Svelt cun cjâf», che al volte il sproc inglês «Fast a ‘nd smart». Chest di fat al vûl jessi il sproc di dute la aziende intal rispuindi in maniere svelte aes richiestis dai clients. E no si pues jessi svelts cence doprâ il cjâf, a àn pensât a Codroip.
GLOCAL_ La sielte di doprâ il furlan dutun cul inglês, saltant di plante fûr il talian, e je une sielte glocal (globâl+locâl) par une aziende che cun lidrîs ben plantadis in Friûl e sodisfe plusôrs clients in dut il mont.
Bruno Colledani