Sfuei Mensîl Furlan Indipendent
Archivi de Patrie

ATUALITÂT – Un president di transizion

............

O leiarês te interviste che al President i vevin domandât se al varès fevelât par furlan aae cunvigne di Ente Friuli nel Mondo: intal 2010 – an de interviste – si è davuelte la setime cunvigne di Ente Friuli nel Mondo e il President Pieri Pittaro al à fevelât par talian come cuasi ducj i intervents dai relatôrs che a jerin sul palc.
Classe 1934, Pieri Pittaro, za responsabil centri vitivinicul regjonâl, za president mondiâl dai enolics, za sindic di Bertiûl e inmò a la vuide de sô aziende di Rivolt, al è stât elet President di Ente Friuli nel Mondo miercus ai 30 di Jugn. O vin stât a cognossilu e a sintîlu par capî miôr cuale che e sarà la sô linie.
– President Pittaro, che mi permeti une batude, Lui che al à confidencis cul argoment, ce «etichete» metaressial su la «Sô butilie»?
Contadin prestât a altris ativitâts.
– Cemût ise madurade la sô candidature?
Il gno non al è stât tirât fûr tal ultin moment dal President Santuz parcè che a jerin masse aspirants e no si rivave a cjatâ un acuardi. Al è vignût fûr il gno non par vie che o soi un pôc fûr de sene di tancj agns e no soi leât a curints o partîts, ancje se o ai lis mês ideis. E cussì dut si è sierât in 3 dîs.
– E ce aial pensât cuant che je àn fate?
Mi soi metût a ridi parcè che o pensi che un tor i 60 agns al varès di passâ la man a chei altris. Cussì o ai fat lassant lis incarghis che o vevin ancje se mi disevin di restâ, parcè che dopo tancj agns al è just che e rivi int gnove. Cussì cuant che mi àn proponût di fâ il president di Ente Friuli nel Mondo o ai dit di no in dutis lis manieris, ma mi àn telefonât ducj e a la o ai scugnût dî di sì. Ma o soi stât clâr fin di subit: il mandât al è di 4 agns, ma jo o sarai un president di passaç che al gjestirà chest moment di transizion e dopo mi dimetarai par fâ gnovis elezions. Mi soi metût a servizi dal Ent cun spirt, par risolvi i problemis che mi àn dit che a son.
– La assemblee che lu à elet no je stade propit trancuile… cemût pensial di tignî il rapuart cun Gurize (il President Gerghetta al à lassade la assemblee sbatint la puarte)?
Gherghetta al à sclarît che no jere une cuistion di personis, ma di maniere: dut al è stât fat un pôc masse di corse. Duncje o pensi che dopo la fieste che o fasarìn a Maian (31 di Lui e 1 di Avost, ndr), o larai a Gurize par presentâmi e cognossilu.
– E ce rispueste vuelial dâ a chei Fogolârs che a domandavin une elezion dal President tignint cont des istancis de base?
La elezion direte e je impussibil: jo o soi par un coivolziment democratic il plui slargjât pussibil, ma si à di jessi ancje pratics. Po dopo, dentri dal diretîf ogni component al varà un vôt e no par cuotis di partecipazion. Ma o intint coinvolzi i fogolârs puartant dentri dal consei i lôr rapresentants: un pe Americhe dal Nord, un pe Americhe dal Sud, un pal Est e un pe Australie. Ma nol è pensabil che a partecipedin fasint ogni volte un viaç e par chest o doprarìn lis videoconferencis.
– Cualis sarano lis sôs prioritâts par Ente Friuli nel Mondo?
Prin di dut o modificarìn il statût slizerint il consei diretîf. Cun di plui o volarès che il President al fos elet de assemblee e no dal consei come cumò. Dopo di vê rifat il statût, magari dentri di Zenâr dal 2011, dopo une schierie di consultazions parcè che o ai voie di sintî ducj, il President si dimetarà e si tornarà a votâ.
Cun di plui o stoi za lavorant al riordin dal personâl: l’ent nol varà plui un diretôr e al restarà dome un segretari, ridusint cussì lis spesis. La linee e je chê di lavorâ fasint cuadrâ il belanç: al è masse facil domandâ prime finanziaments e dopo inviâ lis ativitâts. Prime si à di dâsi di fâ cun ce che si à. Une altre robe che i ten une vore e je la presince dulà che mi invidin, e cuant che no podarai partecipâ diretementri ai events, l’ent al varà in ogni câs un so rapresentant delegât.
– Cognossial La Patrie dal Friûl?
Sì, le ai viodude in cjase di cualchi amì, ma o amet di no jessi inmò un vuestri letôr, ma o proviodarai.
– Ce pensial in gjenerâl de informazion fate doprant la lenghe furlane?
Par me il furlan al è un valôr e lu ai simpri fevelât: o soi un tacât a lis lidrîs. Ma no vin di jessi campaniliscj e no vin di trascurâ ancje lis lenghis forestis.
– Secont lui la lenghe furlane podaressie jessi la lenghe di colegament des comunitâts furlanis tal mont?
Chi o puarti la mê esperience di famee parcè che o ai tancj parincj tal forest: la prime gjenerazion e fevelave furlan, la seconde furlane e inglês, che mi disin «Fevele furlan che no capìn il talian»… ma al è ancje di dî che i plui zovins a stan pierdint la lenghe furlane, ma e cognòs il talian. Duncje la rispueste no je facil.
– Parcè dopo tancj agns i furlans tal mont a continuin a dî che no cognossin il Friûl?
O pensi che al sedi ancje une conseguence di cemût che i nestris emigrants si son rapuartâts cu la societât dulà che a rivavin: si son impegnâts par integrâsi ta chês societâts e chest forsit al à puartâ a smamî un pôc i contats cu la tiere di origjin. Però mi pâr ancje di capî che a son i zovins che cumò a vuelin tornâ a strenzi il leam. Ancje se cualchidun di lôr al fevele plui par talian e nus àn domandât cors par talian.
– Forsit e je dome une cuistion di dâur oportunitâts: Alido Gerussi, vicepresident vicjari di Ente Friuli nel Mondo, nus à dit (interviste su La Patrie dal Friûl di Lui dal 2010, ndr) che i dissendents a son une vore curiôs di cognossi la lenghe furlane…
Lui al cognòs une vore miôr di me la situazion dal EFnM e chê des comunitâts di furlans pal mont. E duncje se o varìn domandis di fâ cors e stages di lenghe furlane, a saran benvignudis e o darìn une rispueste positive. O vin za ativitâts ta chest sens.
– Ce pensial dal insegnament de lenghe furlane a scuele?
O pensi che il nestri çurviel al à potenzialitâts une vore plui grandis di ce che o doprìn: a proposit di aprendiment des lenghis o cjali massime i popui dal Est europe che a imparin une vore di corse tantis lenghis, come pape Zuan Pauli II che o ai cognossût. Duncje o pensi che imparâ il furlan al vadi ben parcè che e je la nestre lenghe, dongje ancje di chês altris lenghis. Ma al è un pecjât che lis fameis no lu doprin cui fîs.
– Te prossime fieste dai fogolârs che si tignarà a Maian fevelarail in ce lenghe?
Ur domandarai ai partecipants se o ai di fevelâ par furlan o par talian.
– Saial cui che a jerin in nestris fondadôrs pre Josef Marchet e Felix Marchi?
Ju ai sintûts a nomenâ, ma o amet che no ai aprofondît il studi des lôr oparis.
– Ce pensial di Achille Tellini?
Mi plaseve il concet di une lenghe che e metès in colegament ducj i popui, ma o ai simpri pensât che l’esperanto nol varès vude fortune parcè che aromai l’inglês al jere za une vore indevant come lenghe francje internazionâl.
– Il plui grant furlan secont Lui?
A seconde dai cjamps, a son tancj i furlans che a son stâts grancj. Pe impreditorie o pensi a Jacopo Linussio, te culture Ottavio Valerio e te politiche mi plâs ricuardâ Tiziano Tessitori
– Ce pensial de idee origjinarie di Tiziano Tessitori a proposit de regjon autonome?
O pensi che lu vedin fermât masse adore. Al veve di lâ fint insom… invezit vuê tra Friûl e Triest si scuen lâ dacuardi ma… a àn creade une regjon miste che no capìs nancje parcè… E po Tessitori al jere di chê gjenerazion che e faseve politiche pure.
– Ce pensial de globalizazion?
Al va ben che lis distancis a son stadis scurtadis e i confins a son colâts, ma propit ta cheste ete, al devente inmò plui impuartant difindi lis lidrîs.
– Cuâl isal il so scritôr furlan preferît?
Amedeo Giacomini pe abilitât di pinelâ lis situazions cu lis peraulis.
– Doprial Internet e lis gnovis tecnologjiis?
Par lavôr in aziende o ai ducj i imprescj, ma personalmentri o soi une vore indaûr e o scuen fâmi judâ. Ma no soi un bon esempli parcè che vuê a coventin.
– Su la cuistion dal vin Friulano, ex Tocai ce pensial?
Jo o vevi proponût «Tai friulano» al puest di «Tocai friulano» e si superave il probleme dal principi gjeografic che la Europe e à doprât: o jerin in svantaç fin dal inizi e o varessin vût di dâsi di fâ par un non gnûf, no pal non «Tocai» che daûr de filosofie de normative europeane i spietave a la Ongjarie parcè che là e je la regjon gjeografiche che si clame cussì.
– Parcè la Sô propueste «Tai friulano» no ise passade?
Parcè che le ai fate jo!… dut câs cumò a son 10 milions di euros par promovi il gnûf non dal «Friulano», ma o speri che chei finanziaments a sedin impleâts pal vin ma ancje ducj chei altris prodots.
– A proposit di promozion, ce pensial de operazion «Depardieu»?
Cun dute la int valide che o vin chi, o dîs dome «No comment»!
– Parcè aial il ritrat dal imperadôr Josef Franz?
Mi à fat cognossi cheste figure Paolo Solimbergo che al veve une grande vision internazionâl e che mi à menât tantis voltis a Viene. Josef Franz al à aministrât une vore ben e al veve rispiet dai popui.
– E parcè aial ancje tantis fotos des Frecce Tricolori?
Parcè che o adori svolâ, o ai il brevet e o ai svolât tant te vite e cumò no pues fâlu plui.
– Vuelial sierâ cuntun pinsîr pai furlans che nus lei tal forest?
I furlans a son simpri stâts definîts «salts, onescj e lavoradôrs», ma cumò e je ore di fâ cognossi lis nestris fantasie, creativitât, imprenditorialitât.
Christian Romanini

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +